କଟକ: ଖୁଦୁରୁକୁଣୀ ଓଷାର ପ୍ରଥମ ପାଳିରେ ଅଘଟଣ । ଫୁଲ ତୋଳିବାକୁ ଯାଇ ନଦୀରେ ବୁଡିଗଲେ 2 ଭଉଣୀ । ଏଭଳି ଅଘଟଣ ଘଟିଛି କଟକ ନିଶ୍ଚିତକୋଇଲି ବାବୁଜଙ୍ଗ ପଞ୍ଚାୟତ ସଫିପୁର ଗାଁରେ ଥିବା ଶୁକପାଇକା ନଦୀରେ । ମୃତ ଦୁଇ ଭଉଣୀ ହେଲେ ସଫିପୁର ଗାଁର ଧୀରେନ୍ଦ୍ର ଦାସଙ୍କ ଝିଅ ସୁଜାତା ଦାସ ଓ ସୁମନ ଦାସ ।
ଆଜି ଖୁଦୁରୁକୁଣୀ ଓଷାର ପ୍ରଥମ ପାଳି ଥିବାରୁ ଭୋରରୁ ପ୍ରାୟ 3 ଜଣ ଯୁବତୀ ଫୁଲ ତୋଳିବାକୁ ଶୁକପାଇକା ନଦୀ ପଠାକୁ ଯାଇଥିଲେ । ନଦୀରେ ଆରପଟେ ଥିବା କିଛି ଫୁଲ ତୋଳିବାକୁ ଦୁଇ ଜଣ ଯୁବତୀ ନଦୀ ମଧ୍ୟରେ ପ୍ରବେଶ କରିଥିଲେ । ମାତ୍ର ନଦୀ ଭିତରେ ଥିବା ଏକ ବଡ ଗାତ ମଧ୍ୟରେ 2 ଯୁବତୀ ଗଳି ପଡିଥିଲେ । ଦୁଇ ଯୁବତୀ ପାଣିରେ ବୁଡି ଯାଉଥିବା ଦେଖି ତୃତୀୟ ଯୁବତୀ ଜଣକ ଗାଁକୁ ଦୌଡି ଯାଇ ଲୋକଙ୍କୁ ଡାକିଥିଲେ । ଲୋକମାନେ ମୁର୍ମୂଷ ହୋଇ 2 ଭଉଣୀଙ୍କୁ ଉଦ୍ଧାର କରି ରଘୁନାଥପୁର ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ । ମାତ୍ର ସେଠାରେ ଡାକ୍ତର ଉଭୟଙ୍କୁ ମୃତ ଘୋଷଣା କରିଥିଲେ । ଘଟଣାକୁ ନେଇ ମେଡିକାଲ ପରିସରରେ ଶୋକର ଛାୟା ଖେଳିଯାଇଛି ।
ଆଜି ଭଳି ପବିତ୍ର ଦିନରେ ଭାଇର ଦୀର୍ଘାୟୁ କାମନା କରି ଭଉଣୀମାନେ ଖୁଦୁରୁକୁଣୀ ଓଷା ପାଳିଥାନ୍ତି । ମାତ୍ର ଏହି 2 ଭଉଣୀଙ୍କ ଓଷା ଅଧାରେ ରହିଗଲା । ସୂଚନାନୁସାରେ, ଏହି ନଦୀ ପଠାରେ ଜେସିବି ଦ୍ବାରା ବଡ ବଡ ଗାତ ଖୋଳାଯାଇଥିଲା । ଏହି ଗାତ କିଏ ଓ କାହିଁକି ଖୋଳିଥିଲା ତାହା ଜଣାପଡିନଥିବାବେଳେ ସ୍ଥାନୀୟବାସୀ ଓ ଜୀବଜନ୍ତୁଙ୍କ ସୁରକ୍ଷା ପାଇଁ କାହିଁକି ଗାତ ଗୁଡିକୁ ପୋତାଯାଇନାହିଁ ବୋଲି ପ୍ରଶ୍ନ ଉଠୁଛି । ଯେଉଁ କାରଣରୁ ଆଜି ଦୁଇ ଯୁବତୀଙ୍କ ପ୍ରାଣ ଚାଲି ଯାଇଥିବା ଗ୍ରାମବାସୀ ଅଭିଯୋଗ କରିଛନ୍ତି । ସେପଟେ ଘଟଣାସ୍ଥଳରେ ମାହାଳହାଟ ଫାଣ୍ଡି ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରୁଛି ।
କଟକରୁ ପ୍ରଭୁ କଲ୍ୟାଣ ପାଲ, ଇଟିଭି ଭାରତ
