ଭୁବନେଶ୍ବର: ପେଶାରେ ଜଣେ ଦିନ ମଜୁରିଆ । କିନ୍ତୁ ନିଶା କିଛି ଅଲଗା । ଦିନରାତି ଏକ କରି ନିଜ ଘରେ ତିଆରି କରିଛନ୍ତି କିଛି ଏଭଳି ଜିନିଷ, ଯାହାକୁ ଦେଖିବା ପାଇଁ ଘଡିଏ ଅଟକି ରହୁଛନ୍ତି ପଥଚାରୀ । ଯେତବେଳେ ଲୋକେ କିଛି ବସ୍ତୁକୁ ଅଦରକାରୀ ଭାବି ଡଷ୍ଟବିନରେ ଫୋପାଡି ଦେଇଥାନ୍ତି ସେତବେଳେ ସେ ତାକୁ ସବୁଠୁ ଦରକାରୀ ବୋଲି ଭାବି ଉଠାଇ ନେଇଥାନ୍ତି ନିଜ ଘରକୁ । ଆଉ ସେହି ବସ୍ତୁରୁ ତିଆରି କରନ୍ତି ବହୁ ଆକର୍ଷଣୀୟ ସାମଗ୍ରୀ । ଯାହା ଅତି ଆକର୍ଷଣୀୟ ଓ ମନୋଲୋଭା ହୋଇଥାଏ ।
କିନ୍ତୁ ସାମୂଦ୍ରିକ ଝଡ 'ଫନି' ତାଙ୍କର ସବୁ ଅକ୍ଲାନ୍ତ ପରିଶ୍ରମକୁ ଭାଙ୍ଗି ଛାରଖାର କରିଦେଇଛି । ତଥାପି ବି ପନ୍ଦାରି ଭାଙ୍ଗି ନପଡି ସେହି ଅସଜଡା ଘରକୁ ସଜାଡିବାରେ ଲାଗିଛନ୍ତି । ପୂର୍ବରୁ ସେହି ବାଟ ଦେଇ ଯାଉଥିବା ପଥଚାରୀ ପନ୍ଦାରି ମୁଦୁଲିଙ୍କ ଘର ସାମନାରେ ଘଡିଏ ଅଟକି ଯାଉଥିବା ବେଳେ ଏବେ କିନ୍ତୁ ଖାଁ ଖାଁ ହୋଇଯାଇଛି ସେହି ରାସ୍ତା ।
ତେବେ ଭୁବନେଶ୍ବରର ସିଆରପି ଛକ ନିକଟରେ ରହୁଛନ୍ତି ପନ୍ଦାରି ମୁଦୁଲି । ପନ୍ଦାରି ପେଶାରେ ଜଣେ ଦିନ ମଜୁରିଆ ହୋଇଥିବାବେଳେ ତାଙ୍କର ନିଶା କିନ୍ତୁ ଭିନ୍ନ । ଦିନରାତି ଅନିଦ୍ରା ହୋଇ ବିଭିନ୍ନ ଅଦରକାରୀ ପଦାର୍ଥ ସାଇକେଲ ଚକ, ଡବା ,ଟିଣ ଆଦିରୁ ସେ ଏକ ଘର ତିଆରି କରିଥିଲେ। ଏନେଇ ପୂର୍ବରୁ ତାଙ୍କୁ ଆମ ପ୍ରତିନିଧି ଭେଟି ପଚାରି ବୁଝିଥିଲେ ତାଙ୍କ ସଫଳତା ପଛର କାହାଣୀ ।
ଭୁବନେଶ୍ବରରୁ ଶତରୂପା ସାମନ୍ତରାୟ, ଇଟିଭି ଭାରତ
