ଭୁବନେଶ୍ୱର: ଦ୍ୱିତୀୟ ଦିନରେ ପହଞ୍ଚିଛି ଷୋଡଶ ବିଧାନସଭାର ଗୃହକାର୍ଯ୍ୟ। ଆଜିର ଏହି କାର୍ଯ୍ୟ ଦିବସ ଆରମ୍ଭରୁ କୃଷି ଏବଂ କୃଷକଙ୍କ ସମସ୍ୟାକୁ ନେଇ ସରକାରଙ୍କୁ ଘେରିଛନ୍ତି ବିରୋଧି। ଗୃହରେ ଏ ପ୍ରସଙ୍ଗରେ ତଥ୍ୟ ରଖି ନପାରି ହଟହଟା ହୋଇଛନ୍ତି କୃଷିମନ୍ତ୍ରୀ ଅରୁଣ ସାହୁ ।
2011 ଜନଗଣନା ଅନୁଯାୟୀ ଓଡ଼ିଶାରେ 57 ଲକ୍ଷ ଚାଷୀ, କୃଷି ଉପରେ ନିର୍ଭରଶୀଳ। ସେମାନଙ୍କ ମଧ୍ୟରୁ 32.8 ଲକ୍ଷ କୃଷକ ଓ 24.20 ଲକ୍ଷ କୃଷିକ୍ଷେତ୍ରରେ କାର୍ଯ୍ୟରତ ଶ୍ରମିକ। 2021 ଜନଗଣନା ପରେ ଅଧିକ ତଥ୍ୟ ଆସିବ। ଚାଷ ପ୍ରତି ଚାଷୀ ବିମୁଖ ହୋଇଥିଲେ ମଧ୍ୟ ଚାଷ ଛାଡିନାହାନ୍ତି ବୋଲି କୃଷିମନ୍ତ୍ରୀ ବିଧାନସଭାର ପ୍ରଶ୍ନକାଳରେ ଗୃହକୁ ଜଣାଇଥିଲେ। ମନ୍ତ୍ରୀଙ୍କ ଏପରି ଉତ୍ତରରେ ଅସନ୍ତୋଷ ପ୍ରକାଶ କରିଥିଲେ କଂଗ୍ରେସ ବିଧାୟକ।
ବାଚସ୍ପତି ସୂର୍ଯ୍ୟନାରାୟଣ ପାତ୍ର ବିଭାଗୀୟ ମନ୍ତ୍ରୀଙ୍କୁ ନିର୍ଦ୍ଧିଷ୍ଟ ଉତ୍ତର ଦେବାକୁ ନିର୍ଦେଶ ଦେଇଥିଲେ। କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର ଅଭିଯୋଗ କରିଥିଲେ ଯେ, ରାଜ୍ୟ ସରକାର କାଳିଆ ଯୋଜନାରେ 50 ଲକ୍ଷଙ୍କୁ ସହାୟତା ଦେଇଥିବା କହୁଥିବା ବେଳେ କୃଷିମନ୍ତ୍ରୀ ଗୃହରେ ତଥ୍ୟ ଲୁଚାଉଛନ୍ତି।
ଏହାର ଉତ୍ତର ଦେବାକୁ କୃଷିମନ୍ତ୍ରୀ କହିଥିଲେ ଯେ କୃଷି ଉଦ୍ୟୋଗରେ 934 ପ୍ରତ୍ୟକ୍ଷ ଏବଂ 3736 ପରୋକ୍ଷ ଆତ୍ମନିଯୁକ୍ତି ପାଇଛନ୍ତି। ସେହିପରି କୃଷିସେବା କେନ୍ଦ୍ର ଜରିଆରେ 2587 ପ୍ରତ୍ୟକ୍ଷ ଓ 10,348 ଜଣଙ୍କୁ ପରୋକ୍ଷ ଭାବେ ନିଯୁକ୍ତି ମିଳିଛି। ଏ ବାବଦରେ ନିର୍ଦ୍ଧିଷ୍ଟ ତଥ୍ୟ ରଖି ପାରିନଥିଲେ କୃଷିମନ୍ତ୍ରୀ।
ଭୁବନେଶ୍ବରରୁ ଅଜିତ ଦାସ, ଇଟିଭି ଭାରତ
