ଚାଷୀଙ୍କ ପାଇଁ ତତ୍ପର ସରକାର: ବଢିବ ଆୟ, ପ୍ରତିଷ୍ଠା ହେବ କୃଷକ ବଜାର

କୃଷକଙ୍କ ଆୟ ବୃଦ୍ଧି ଉପରେ ଗୁରୁତ୍ୱ ପ୍ରଦାନ କରିଛନ୍ତି ରାଜ୍ୟ ସରକାର। ଆଉ ଏହି ମର୍ମରେ ରାଜ୍ୟ କୃଷିନୀତି 2013ର ପରିବର୍ତ୍ତନ କରିବା ପାଇଁ ସବୁ ବିଭାଗକୁ ମତାମତ ଦେବାକୁ କୁହାଯାଇଛି।

ଭୁବନେଶ୍ବର: ରାଜ୍ୟରେ ଚାଷୀଙ୍କ ଆୟ ବୃଦ୍ଧି କରିବାକୁ ନେଇ ସଜାଗ ଅଛନ୍ତି ରାଜ୍ୟ ସରକାର । ଆଉ ଏହି ମର୍ମରେ କୃଷିକ୍ଷେତ୍ରରୁ ଉତ୍ପାଦିତ ଦ୍ରବ୍ୟର ବିକ୍ରୟ ପାଇଁ କୃଷକ ବଜାର ସୃଷ୍ଟି କରିବା ଉପରେ ଦିଆଯାଇଛି ଗୁରୁତ୍ବ । ଆଉ ଏଥିପାଇଁ ରାଜ୍ୟ କୃଷିନୀତିରେ ପରିବର୍ତ୍ତନ ଆଣିବାର ଆବଶ୍ୟକତା ରହିଛି । ରାଜ୍ୟ କୃଷି ବିଭାଗ ପକ୍ଷରୁ ଏନେଇ ଜଣାଇ ଦିଆଯାଇଛି । ଅନ୍ୟପଟେ ଏ ସମ୍ପର୍କିତ ଏକ ବୈଠକ ମଙ୍ଗଳବାର ରାଜ୍ୟ ସଚିବାଳୟ ଠାରେ ଅନୁଷ୍ଠିତ ହୋଇଯାଇଛି ।

ମୁଖ୍ୟ ଶାସନ ସଚିବ ଆଦିତ୍ୟ ପ୍ରସାଦ ପାଢୀଙ୍କ ଅଧ୍ୟକ୍ଷତାରେ ବସିଥିବା ବୈଠକରେ କୃଷି ସଚିବ ସୌରଭ ଗର୍ଗ, ସମବାୟ ସଚିବ, ରାଜସ୍ଵ ସଚିବଙ୍କ ସମେତ ସମସ୍ତ ବିଭାଗର ଅଧିକାରୀ ଏହି ବୈଠକରେ ଯୋଗ ଦେଇଥିଲେ । ବର୍ତ୍ତମାନ କାର୍ଯ୍ୟକାରୀ ହେଉଥିବା ରାଜ୍ୟ କୃଷିନୀତି ୨୦୧୩କୁ ପରିବର୍ତ୍ତନ କରାଯିବ । ଆସନ୍ତା ଦୁଇ ସପ୍ତାହ ମଧ୍ୟରେ କୃଷି ନୀତିରେ ପରିବର୍ତ୍ତନ କରିବା ଲାଗି ସବୁ ବିଭାଗର ମତାମତ ଲୋଡାଯାଇଛି । ଏଥିପାଇଁ ଆସନ୍ତା ଦୁଇ ସପ୍ତାହ ମଧ୍ୟରେ ରିପୋର୍ଟ ଦେବାକୁ ସବୁ ବିଭାଗକୁ ନିର୍ଦ୍ଦେଶ ଦିଆଯାଇଛି ବୋଲି କୃଷି ସଚିବ କହିଛନ୍ତି ।

ଭୁବନେଶ୍ବରରୁ ତପନ ଦାସ, ଇଟିଭି ଭାରତ