ଭୁବନେଶ୍ବର: ପ୍ରଶ୍ନ ପୁସ୍ତକ ବଣ୍ଟନକୁ ନେଇ । ଉତ୍ତର ରଖୁଛନ୍ତି ବାଣିଜ୍ୟ ମନ୍ତ୍ରୀ । ପ୍ରଶ୍ନ ଚାଉଳ, ଡାଲି, ଆଳୁ ଓ ପିଆଜ ଉପରେ । ଉତ୍ତର ରଖୁଛନ୍ତି ଅର୍ଥମନ୍ତ୍ରୀ । ମନ୍ତ୍ରୀ ମରୁଡି ଗୃହରେ ଆଜି ଦେଖିବାକୁ ମିଳିଥିଲା ଏପ୍ରକାର ସ୍ଥିତି । ବହୁ ମନ୍ତ୍ରୀ ଓ ବିଧାୟକ ପାଟକୁରା ନିର୍ବାଚନରେ ବ୍ୟସ୍ତ । ଏପଟେ ଟ୍ରାନ୍ସଫରରେ ହିଁ ଚାଲିଥିଲା ବିଧାନସଭା । ନିରଞ୍ଜନ ପୂଜାରୀ ଏବଂ ପଦ୍ମନାଭ ବେହେରା ସମସ୍ତ ପ୍ରଶ୍ନର ଉତ୍ତର ରଖୁଥିଲେ । ଯାହାକୁ ନେଇ ଉଭୟ ବିଜେପି ଓ କଂଗ୍ରେସ ସରକାରଙ୍କୁ ଘେରିଛନ୍ତି ।
ଆଜି ପ୍ରଶ୍ନକାଳରେ ପୁସ୍ତକ ବଣ୍ଟନ ନେଇ ପ୍ରଶ୍ନ କରିଥିଲେ କଂଗ୍ରେସ ବିଧାୟକ ସନ୍ତୋଷ ସିଂହ ସାଲୁଜା । ହେଲେ ଗଣଶିକ୍ଷା ମନ୍ତ୍ରୀ ଅନୁପସ୍ଥିତ ଥିଲେ । ଫଳସ୍ବରୂପ ବାଣିଜ୍ୟ ଓ ପରିବହନ ମନ୍ତ୍ରୀ ପଦ୍ମନାଭ ବେହେରା ଉତ୍ତର ରଖିଥିଲେ । ଖାଲି ସାଲୁଜାଙ୍କ ପ୍ରଶ୍ନ କାହିଁକି, ଅନ୍ୟ ବିଧାୟକମାନଙ୍କ ପ୍ରଶ୍ନର ଉତ୍ତର ମଧ୍ୟ ଭାରପ୍ରାପ୍ତ ମନ୍ତ୍ରୀ ଭାବରେ ରଖୁଥିଲେ ନିରଞ୍ଜନ ଓ ପଦ୍ନନାଭ । ମନ୍ତ୍ରୀ ନିରଞ୍ଜନ ପୂଜାରୀଙ୍କୁ ଯୋଗାଣ ଓ ଉଚ୍ଚଶିକ୍ଷା ବିଭାଗର ଉତ୍ତର ରଖିବାକୁ ପଡୁଥିଲା ।
ଘଟଣାକୁ ନେଇ ସରକାରଙ୍କୁ ଘେରିଥିଲେ କଂଗ୍ରେସ ବିଧାୟକ ସନ୍ତୋଷ ସିଂହ ସାଲୁଜା । ଯଦି 2 ଜଣ ମନ୍ତ୍ରୀରେ କାମ ଚଳିଯାଉଛି, ତେବେ 15 ପ୍ରତିଶତ ମନ୍ତ୍ରୀ ରଖିବାର ଆବଶ୍ୟକ ନାହିଁ ବୋଲି କଟାକ୍ଷ କରିଥିଲେ ସନ୍ତୋଷ । ସମର୍ଥନ ଜଣାଇଥିଲେ ତାରା ପ୍ରସାଦ ବାହିନୀପତି ଓ ବିରୋଧୀ ଦଳ ଉପନେତା ବିଷ୍ଣୁ ସେଠୀ। 21ରୁ 13 ଜଣ ମନ୍ତ୍ରୀଙ୍କ ଅନୁପସ୍ଥିତକୁ ନେଇ ଉଠାଇଥିଲେ ପ୍ରଶ୍ନ ।
ସିସିଆର ଠିକ କରିବାକୁ ମନ୍ତ୍ରୀ କାମରେ ଲାଗିଛନ୍ତି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି ପାଟକୁରା ଗସ୍ତରେ ଯାଉଛନ୍ତି। ତେଣୁ ଏଭଳି ସ୍ଥିତି ସୃଷ୍ଟି ହୋଇଛି । ଏପଟେ ମନ୍ତ୍ରୀ ନିରଞ୍ଜନ ପୂଜାରୀ କହିଛନ୍ତି, ବିଧାୟକ ଉତ୍ତର ମାଗୁଛନ୍ତି । ଯେଉଁ ମନ୍ତ୍ରୀ ଦେଲେ ଚଳିବ। ସେଥିରେ କୌଣସି ଅସୁବିଧା ନାହିଁ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
