ଭୁବନେଶ୍ବର: ଫନି ଫଣାରେ ଚୁରମାର ହୋଇଯାଇଛି ରାମରହିମଙ୍କ ସ୍ବପ୍ନ । ଗରିବ ପିଲାଙ୍କୁ ଶିକ୍ଷିତ କରାଉଥିବା ଏହି 2 ବନ୍ଧୁ ଏବେ ନିଃସହାୟ । ବସ୍ତି ପିଲାଙ୍କ ଉଜ୍ଜଳ ଭବିଷ୍ୟତ ପାଇଁ ଗଢି ତୋଳିଥିବା ସ୍କୁଲ ଏବେ ଛାରଖାର ହୋଇଯାଇଛି । ସ୍କୁଲ ଛାତ ଠାରୁ ଆରମ୍ଭ କରି ଶ୍ରେଣୀ ଗୃହର ଆସବାବପତ୍ର ସବୁ କିଛି ଭାଙ୍ଗି ମାଟିରେ ମିଶିଯାଇଛି ।
ନିତି ଧାଡି ଧାଡି ଠିଆ ହୋଇ ପ୍ରାର୍ଥନା ବୋଲୁଥିବା ଏହି ଗରିବ ପିଲାମାନେ ଆଜିକୁ 26 ଦିନ ହେବ ଘରେ ବସିଛନ୍ତି । କାରଣ ସେମାନେ ବୁଝିପାରିଛନ୍ତି , ପାଠ ପଢିବାକୁ ନା ସ୍କୁଲ ଅଛି ନା କଳାପଟା । ଏପଟେ ଅଭିଭାବକ ମଧ୍ୟ ହତାଶ । ଛୋଟ ମୋଟ କାମ କରି ପିଲାଙ୍କୁ ପଢାଉଥିବା ବାପା ମା ମଧ୍ୟ କଣ ଅବା କରିପାରିବେ । ଫନି ସମ୍ପତ୍ତି ନେବା ସହ ପିଲାଙ୍କ ଭବିଷ୍ୟତକୁ ମଧ୍ୟ ଧୂଳିସାତ କରିଦେଇଛି ।
ଆଜିର ଛୁଆଁ-ଅଛୁଆଁ ଭେଦଭାବ ଓ ଜାତିବାଦ ପ୍ରଥା ସମାଜରେ ପ୍ରେରଣା ହେଉଛନ୍ତି ସାଲିଆ ସାହିର ରତ୍ନାକର ମହାନ୍ତି ଓ ଶେଖ ଆସିକ ଅଲି । ଏ ଦୁଇ ଜଣ ରାଜଧାନୀର ରାମ ରହିମ ଭାବରେ ବେଶ ପରିଚିତ । ବଡ ବଡ ଚାକିରୀରୁ ମୁହଁ ଫେରାଇ ନେଇ ମାସକୁ ମାତ୍ର 200 ଟଙ୍କାରେ ବସ୍ତି ଗରିବ ପିଲାଙ୍କୁ ପାଠ ପଢ଼ାନ୍ତି ଏମାନେ । ଏଥିସହ ନିଶାଗ୍ରସ୍ତ ହୋଇ ବୁଲୁଥିବା ପିଲାଙ୍କୁ ଗୁଣାତ୍ମକ ଶିକ୍ଷା ବି ଦିଅନ୍ତି । ଏହି 2ଜଣ ନିଜ ଚେଷ୍ଟାରେ ବିଦ୍ୟାଳୟଟିକୁ ଗଢି ତୋଳିଥିଲେ । ହେଲେ ଏବେ ଫନି ଚଡକ ପଡିଛି ତାଙ୍କ ମୁଣ୍ଡ ଉପରେ । ଫନି ଗଲା ପରେ ଆଜି ଏ ବିଦ୍ୟାଳୟର ଅବସ୍ଥା ନ କହିବା ଭଲ ।
ମାତ୍ର କେଇ ଟଙ୍କା ଓ କିଛି ସହାୟତାରେ ତିଆରି ହୋଇଥିଲା ଏହି ସ୍କୁଲ । ଆଉ ଏବେ ଏଠାରେ ଥିବା ପ୍ରାୟ 95 ଭାଗ ଜିନିଷ ଧ୍ବସ୍ତବିଧ୍ବସ୍ତ । ଏପରି ସ୍ଥିତିରେ କିପରି ପୁନଃଉଦ୍ଧାର ହେବ ଏହି ମଣିଷ ତିଆରି କାରଖାନା । ଯଦି କିଛି ବଦାନ୍ୟ ବ୍ୟକ୍ତି ସହାୟତା କରନ୍ତି, ତେବେ ପୁଣି ଥରେ ଗଢିଉଠିବ ଏହି କାରଖାନା । ଉଦୟ ହେବ ଏହି ଗରିବ ବସ୍ତିବାସିନ୍ଦା ଛୁଆଙ୍କ ଭାଗ୍ୟ ।
ଭୁବନେଶ୍ବରରୁ ଶତରୂପା ସାମନ୍ତରାୟ, ଇଟିଭି ଭାରତ
