ଭୁବନେଶ୍ବର: ବିଜେପିକୁ ଚାରିଆଡୁ ଚକ୍ରବ୍ୟୁହରେ ପକାଇବା ପାଇଁ ସମସ୍ତ ଶକ୍ତିସାମର୍ଥ୍ୟ ଖଟାଉଛି ବିଜେଡି । ରବିବାର ୨୦୧୯ ନିର୍ବାଚନ ପାଇଁ ବିଜେପି ପକ୍ଷରୁ ଜାରି କରାଯାଇଥିବା 'ସଂକଳ୍ପ ପତ୍ର' କୁ ତର୍ଜମା କରି ବିଜେପିକୁ ସଙ୍କଟରେ ପକାଇଛି ବିଜୁ ଜନତା ଦଳ । ଭାରତୀୟ ଜନତା ପାର୍ଟି ଓଡ଼ିଶାର ୪.୫ କୋଟି ଲୋକଙ୍କୁ ପ୍ରତାରଣା କରିଛି। ଓଡିଶାବାସୀଙ୍କୁ ଠକିବା ଅଭିଯୋଗରେ ଖାରବେଳ ଥାନାରେ ଲିଖିତ ଅଭିଯୋଗ କରିଛି ବିଜେଡି । ୨୦୧୯ ଇସ୍ତାହାରରେ ସ୍ଵତନ୍ତ୍ର ରାଜ୍ୟ ପାହ୍ୟା ପ୍ରସଙ୍ଗ ନାହିଁ, ଏହା ରାଜ୍ୟବାସୀଙ୍କ ସହ ବିଶ୍ବାସଘାତକତା କରାଯାଇଥିବା କହି ଥାନାର ଦ୍ୱାରସ୍ଥ ହୋଇଛି ବିଜେଡି ।
ବିଜେଡ଼ିର ୩ ଜଣିଆ ପ୍ରତିନିଧି ଦଳ ଏହି ମାମଲାକୁ ନେଇ ଖାରବେଳ ଥାନାର ଦ୍ବାରସ୍ଥ ହୋଇଛନ୍ତି । ଏନେଇ ବିଜେଡ଼ି ମୁଖପାତ୍ର ସସ୍ମିତ ପାତ୍ର କହିଛନ୍ତି ୨୦୧୯ ସାଧାରଣ ନିର୍ବାଚନରେ ବିଜେପି ୨୦୧୪ରେ ଦେଇଥିବା ପ୍ରତିଶ୍ରୁତିରୁ ଓହରିଯାଇଛି। 2014 ନିର୍ବାଚନୀ ଇସ୍ତାହାରରେ ବିଜେପି କ୍ଷମତାକୁ ଆସିଲେ ଓଡ଼ିଶାକୁ ସ୍ଵତନ୍ତ୍ର ରାଜ୍ୟ ପାହ୍ୟା ମିଳିବା ଉଲ୍ଲେଖ କରିଥିଲା । କେନ୍ଦ୍ରରେ ବିଜେପି ସରକାର ଆସିଲା ସତ ହେଲେ ଓଡିଶାକୁ ସ୍ବତନ୍ତ୍ର ରାଜ୍ୟ ମାନ୍ୟତା ଦେବା କଥା ଏକଦମ ପାସୋରି ଗଲା କେନ୍ଦ୍ର ।
ଗୋଟିଏ ପଟେ ବିଜେପି ନିର୍ବାଚନୀ ଇସ୍ତାହାରରେ ଦେଇଥିବା ପ୍ରତିଶ୍ରୁତି ପାଳନ ନ କରିବା ଏବଂ ଚଳିତ ନିର୍ବାଚନୀ ଇସ୍ତାହାରରେ ଉକ୍ତ ବିଷୟକୁ ଅଣଦେଖା କରିବା ଏକ ସଙ୍ଗୀନ ବିଷୟ । ରାଜ୍ୟବାସୀଙ୍କୁ ପ୍ରତିଶ୍ରୁତି ଦେଇ ପ୍ରତାରଣା କରିବା ସହ ବିଶ୍ବାସଘାତ କରିଥିବାରୁ ବିଜେପି ବିରୋଧରେ ମାମଲା ରୁଜୁ କରିବା ପାଇଁ ବିଜେଡି ପକ୍ଷରୁ ଖାରବେଳନଗର ଥାନାରେ ଦାବି କରାଯାଇଛି ।
ଭୁବନେଶ୍ବରରୁ ବିକାଶ କୁମାର ଦାସ, ଇଟିଭି ଭାରତ
