ବୌଦ୍ଧ: ଆସନ୍ତା ପୁରୀ ରଥଯାତ୍ରା ପାଇଁ ନିର୍ମାଣ ହେବ ରଥ । ଏଥିପାଇଁ ବୌଦ୍ଧ ତଳଗାଁ ଜଙ୍ଗଲରୁ ଶ୍ରୀକ୍ଷେତ୍ର ପୁରୀ ଅଭିମୁଖେ ବାହାରିଛି ରଥକାଠ । ସ୍ବତନ୍ତ୍ର ପୂଜାର୍ଚ୍ଚନା ପରେ 31 ଖଣ୍ଡ ଅସନ କାଠକୁ ପଠାଯାଇଥିବା ସୂଚନା ମିଳିଛି । ସୋମବାର ବୌଦ୍ଧ ଜିଲ୍ଲା ମାଧପୁର ବନାଞ୍ଚଳର ତଳଗାଁ ସେକ୍ସନରୁ ଏହି ରଥକାଠ ପଠାଯାଇଥିବା ଜଣାପଡିଛି ।
ତଳଗାଁ ସେକ୍ସନର ହାତୀଧରା ସଂରକ୍ଷିତ ଜଙ୍ଗଲରୁ କୋଡିଏ ଫୁଟିଆ ଦଶଟି ଓ ଦଶ ଫୁଟିଆ 21 ଗୋଟି ଅସନ କାଠ ଗଣ୍ଡିକୁ ସ୍ବତନ୍ତ୍ର ଭାବେ ପୂଜାର୍ଚ୍ଚନା କରାଯାଇଛି । ପରେ ଏହାକୁ ଏକ ଟ୍ରକ ଯୋଗେଁ ପୁରୀ ଅଭିମୁଖେ ପଠାଯାଇଛି । ତଳଗାଁ ଜଙ୍ଗଲ କର୍ମଚାରୀ ସୁଶାନ୍ତ କୁମାର ସାହୁ, ପ୍ରକାଶ କୁମାର ପ୍ରଧାନ ଓ ସ୍ଥାନୀୟ ଶ୍ରଦ୍ଧାଳୁଙ୍କ ଉପସ୍ଥିତିରେ ଏହି ପବିତ୍ର କାର୍ଯ୍ୟ ସମ୍ପାଦନ ହୋଇଛି ।
ବୌଦ୍ଧ ଜଙ୍ଗଲ ବିଭାଗ ସହାୟତାରେ ଜିଲ୍ଲାର ବିଭିନ୍ନ ସ୍ଥାନରେ ଶ୍ରୀ ଜଗନ୍ନାଥ ବନ ପ୍ରକଳ୍ପ ସଫଳ ହୋଇଥିବାବେଳେ ବିଗତ ଅନେକ ବର୍ଷ ହେଲା ବୌଦ୍ଧର ବିଭିନ୍ନ ଜଙ୍ଗଲରୁ ରଥକାଠ ଯୋଗାଇ ଦିଆଯାଉଛି । ସୋମବାର ପୁରୀକୁ ରଥକାଠ ଯିବା ପରେ ଶ୍ରଦ୍ଧାଳୁଙ୍କ ଗହଣରେ ବେଶ ଉତ୍ସାହ ରହିଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
