ବୌଦ୍ଧ: ନିରାଶ୍ରୟ, ଅସହାୟ ମହିଳାଙ୍କ ପାଖରେ ଅପହଞ୍ଚ ସହାୟତା । କେତେ କେତେ ଯୋଜନା, ହେଲେ ଯୋଜନା କାହା ପାଇଁ ହେଉଛି ? ତୃଣମୂଳ ସ୍ତରରେ ଯୋଜନା ସବୁ ଯନ୍ତ୍ରଣାରେ କିଭଳି ରୂପାୟନ ହୋଇଯାଉଛି, ତାହା ପ୍ରତି କାହାର ନିଘା ନାହିଁ । ବୌଦ୍ଧ ଜିଲ୍ଲା ବ୍ରାହ୍ମଣୀ ପାଲି ପଞ୍ଚାୟତ ଜଡାପାଲ ଗ୍ରାମର ଚାରସାହିରେ ପତିହୀନା ମୈଥିଳୀ ସାହୁଙ୍କ ଦୁଃଖଦ କାହାଣୀ ଯୋଜନା କିଭଳି ପ୍ରହସନ ପାଲଟିଛି ତାହା ଦର୍ଶାଉଛି । ଗୁହାରି କରିବା ପାଇଁ ଧାଇଁ ଧାଇଁ ନୟାନ୍ତ ହେଲେଣି ହେଲେ ଏ ଯାଏଁ ମିଳିନି ବିଧବା ଭତ୍ତା ।
ଚାରସାହିର ରମେଶ ସାହୁ ଓ ତାଙ୍କ ପତ୍ନୀ ମୈଥିଳୀ ସାହୁ । ଘରେ ପୁଅ, ବୋହୂ, ଦୁଇ ଦୁଇଟି ନାତିରେ ସଂସାର ହସଖୁସିରେ ଚଳୁଥିଲା । ହେଲେ ଅଚାନକ ଘରକୁ ମାଡି ବସିଥିଲା ବିପଦ। ପ୍ରାୟ ଆଠବର୍ଷ ତଳେ ପ୍ରଥମେ ମୈଥିଳୀ ସାହୁଙ୍କ ପୁଅ ଓ ପରେ ତିନି ବର୍ଷ ତଳେ ସ୍ବାମୀଙ୍କ ସ୍ବର୍ଗବାସ ହେଲା । ଉଭୟ ଶାଶୁ ବୋହୂ ବୈଧବ୍ୟ ଯନ୍ତ୍ରଣାରେ ଛଟପଟ ହୋଇ ମଧ୍ୟ ପେଟର ଜ୍ବାଳା ଓ ଦୁଇ ଛୋଟ ନାତିର ମୁହଁକୁ ଦେଖି ଘରୁ ବାହାରକୁ ଗୋଡ କାଢି ଥିଲେ । ଶାଶୂ, ବୋହୂ ଅନ୍ୟର ଜମିରେ କିଛି କାମଦାମ କରି ପେଟ ପୋଷୁଛନ୍ତି ।
ସବୁଠାରୁ ଆଶ୍ଚର୍ଯ୍ୟର ବିଷୟ ଯେ ବୋହୂକୁ ବିଧବା ଭତ୍ତା ତିନି ଶହ ଟଙ୍କା ମିଳୁଛି । ହେଲେ ମୈଥିଳୀଙ୍କୁ ଦୀର୍ଘ ତିନି ବର୍ଷର ଗୁହାରୀ ପରେ ମଧ୍ୟ ବିଧବା ଭତ୍ତା ମିଳିପାରି ନାହିଁ । ସରକାରଙ୍କ ଏତେ ସବୁ ଯୋଜନା ସତ୍ତ୍ବେ ଏପରି କିଭଳି ଗୋଟିଏ ପରିବାର କଲବଲ ହେଉଛନ୍ତି ସେନେଇ ପ୍ରଶ୍ନବାଚୀ ସୃଷ୍ଟି ହୋଇଛି । ଏସମ୍ପର୍କରେ ସ୍ଥାନୀୟ ସରପଞ୍ଚଙ୍କୁ ଯୋଗାଯୋଗ କରିବାରୁ ସେ ଅତିଶୀଘ୍ର ମୈଥିଳୀଙ୍କୁ ସହାୟତା ଯୋଗାଇଦେବାକୁ ପ୍ରତିଶ୍ରୁତି ଦେଇଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
