ବୌଦ୍ଧ: ଉପାନ୍ତ ଗ୍ରାମରେ ପହଞ୍ଚି ପାରୁନି ସରକାରଙ୍କ ବିକାଶର ଗାଡି । ପଞ୍ଚାୟତଗୁଡିକରେ ବ୍ୟାପକ ଦୁର୍ନୀତି ଯୋଗୁଁ ଏଭଳି ପରିସ୍ଥିତି ସୃଷ୍ଟି ହେଉ ଥିବାବେଳେ ଅନେକ ଲୋକଙ୍କ ନିକଟରେ ସରକାରଙ୍କ କଲ୍ୟାଣକାରୀ ଯୋଜନା ଠିକରେ ପହଞ୍ଚି ପାରୁନଥିବା ଅଭିଯୋଗ ହୋଇଛି ।
ବୌଦ୍ଧ ଜିଲ୍ଲା ସଦର ବ୍ଲକ ଅନ୍ତର୍ଗତ ବଘିଆପଡା, ଟିକରପଡା, ଆମ୍ବଝରୀ, ଗୁନ୍ଦୁଳିଆ ଭଳି ପଞ୍ଚାୟତର ଅନେକ ଗ୍ରାମକୁ ସବୁଦିନିଆ ରାସ୍ତା ଅଭାବ ସାଙ୍ଗକୁ ଆବାସ ଗୃହ, ପାନୀୟଜଳ, ରାସନ କାର୍ଡ, ସାମାଜିକ ସୁରକ୍ଷା ଯୋଜନା ଠିକରେ ହିତାଧିକାରୀଙ୍କୁ ମିଳୁନଥିବା ଅଭିଯୋଗ ହୋଇଛି । ଏଥିପାଇଁ ମୁଖ୍ୟତଃ ପଞ୍ଚାୟତରେ ବ୍ୟାପକ ଦୁର୍ନୀତିକୁ ଦାୟୀ କରାଯାଇଛି ।ଆମ୍ବଝରୀ ପଞ୍ଚାୟତରେ କନ୍ଧ ସମ୍ପ୍ରଦାୟର ଲୋକ ଆବାସ ଯୋଜନାରୁ ବଞ୍ଚିତ ଥିବାବେଳେ ବଘିଆପଡା ଓ ଟିକରପଡା ପଞ୍ଚାୟତରେ ଆବାସ ଯୋଜନାରେ ଦୁର୍ନୀତି ହୋଇଥିବା ଅଭିଯୋଗ ହୋଇଛି ।
ସେପଟେ ବର୍ତ୍ତମାନ ଲକଡାଉନ ସମୟରେ ପଞ୍ଚାୟତର ଶ୍ରମିକଙ୍କୁ କାମ ଯୋଗାଇ ଦେବାକୁ ସରକାର ଏନଆରଇଜିଏସ ମାଧ୍ୟମରେ ବନ୍ଧ କାମ ଯୋଗାଇ ଥିଲେ ମଧ୍ୟ ପଞ୍ଚାୟତ ପକ୍ଷରୁ ଏସମସ୍ତ କାର୍ଯ୍ୟ ମେସିନ ମାଧ୍ୟମରେ କରାଯାଉଥିବାରୁ ଶ୍ରମିକମାନେ ଗଭୀର ପ୍ରଭାବିତ ହେଉଛନ୍ତି । ଫଳରେ ଏସବୁ ଅଞ୍ଚଳରୁ ଦାଦନ ଖଟିବାକୁ ଶ୍ରମିକମାନେ ବାହାର ରାଜ୍ୟକୁ ଯାଉଛନ୍ତି । ଏନେଇ ବୁଦ୍ଧିଜୀବୀ ଗଭୀର ଉଦବେଗ ପ୍ରକାଶ କରିବା ସହିତ ଏସବୁ ଦୁର୍ନୀତିର ତଦନ୍ତ ପାଇଁ ଦାବି କରିଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
