ବୌଦ୍ଧ: ଅନ୍ଧ ବିଶ୍ବାସର ଅନ୍ଧ ଗଳିରେ ବଟବଣା ଆଜିର ଲୋକେ । ବିଜ୍ଞାନ ଯେତେ ଆଗେଇଲେ ମଧ୍ୟ ଜାବୁଡି ଧରି ରଖିଥିବା ଅନ୍ଧ ବିଶ୍ବସଠାରୁ ଦୂରେଇ ପରୁନି ଆଜିର ସମାଜ । ବସନ୍ତ ରୋଗରେ ମୃତ୍ୟୁ ଓ ପରେ ପୂଜାପାଠର ଅନ୍ଧ ବିଶ୍ବାସ ସମସ୍ତଙ୍କୁ ଆଶ୍ଚର୍ଯ୍ୟ କରିଛି । ବିଶ୍ବାସ ଓ ଅନ୍ଧବିଶ୍ବାସର ଏହି ପରିସ୍ଥିତି କୌଣସି ଉପାନ୍ତ ଅଞ୍ଚଳରେ ନୁହେଁ, ଥାନା ଓ ଡାକ୍ତରଖାନାଠାରୁ ମାତ୍ର କେଇ ମିଟର ଦୂର ବୌଦ୍ଧ ଜିଲ୍ଲା ସଦର ମହକୁମାରରେ ଦେଖିବାକୁ ମିଳିଛି ।
ବୌଦ୍ଧ ଜିଲ୍ଲା ସଦର ମହକୁମାର କେଉଟ ସାହି ନିବାସୀ ୫୨ ବର୍ଷୀୟ କୁନି ମହାକୁଡ଼ ବସନ୍ତ ରୋଗରେ ପୀଡିତ ଗୁରୁତର ହୋଇପଡିଲେ । ଶୁକ୍ରବାର କୁନିଙ୍କୁ ପରିବାର ଲୋକେ ବୌଦ୍ଧ ମୁଖ୍ୟ ଡାକ୍ତରଖାନାରେ ଭର୍ତ୍ତି କରିଥିଲେ । ତାଙ୍କୁ ଅଧିକ ଚିକିତ୍ସାର ଆବଶ୍ୟକତା ଥିବା ହେତୁ ଅନ୍ୟତ୍ର ଚିକିତ୍ସା ପାଇଁ ଡାକ୍ତର ପରାମର୍ଶ ଦେଇଥିଲେ । ସୋମବାର କୁନିଙ୍କ ସ୍ବାସ୍ଥ୍ୟାବସ୍ଥା ଆହୁରି ଗୁରୁତର ହେବା ସହିତ ତାଙ୍କର ମୃତ୍ୟୁ ହୋଇଥିଲା, କିନ୍ତୁ ପରିବାର ପକ୍ଷରୁ କୁନିଙ୍କୁ ଜୀବିତ ଭାବେ ଅନେକ ପୂଜାପାଠ କରାଯାଇଥିଲା।
ସୋମବାର ଦିନ ତମାମ ବିଭିନ୍ନ ପୂଜା ଉପକରଣ ସହିତ କୁନିଙ୍କ ଆରୋଗ୍ୟ ଲାଭ ପାଇଁ ସବୁ ପ୍ରକାର ଚେଷ୍ଟା କରାଯାଇଥିଲା। ଶେଷରେ ମାଆର ମୃତ୍ୟୁକୁ ମାନିନେଇ ପୁଅ, ବୋହୂ ଓ ପରିବାର ଲୋକେ ମଙ୍ଗଳବାର ଅପରାହ୍ନରେ କୁନିଙ୍କ ମୃତ ଦେହକୁ ପୋତି ଦେଇଥିଲେ । ସବୁଠାରୁ ଆଶ୍ଚର୍ଯ୍ୟର କଥା ଏସବୁ ଘଟଣା ସୋମବାର ଦିନ ତମାମ ଚାଲିଥିଲେ ମଧ୍ୟ କୌଣସି ସରକାରୀ ବାବୁ ଏହାର ଟେର ପାଇନାହାଁନ୍ତି।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
