ବୌଦ୍ଧ: ନବ ଦିନାତ୍ମକ ଯାତ୍ରାର ପ୍ରଥମ ସୋପାନ ଶ୍ରୀ ବିଗ୍ରହଙ୍କ ସ୍ନାନଯାତ୍ରା ବା ଲକ୍ଷ୍ମୀବୁଡ ଉତ୍ସବ । ବୌଦ୍ଧର ଶ୍ରୀ ଜଗନ୍ନାଥ ମନ୍ଦିରରେ ଅତ୍ୟନ୍ତ ଭକ୍ତି ଓ ଶ୍ରଦ୍ଧାର ସହ ପାଳିତ ହୋଇଯାଇଛି ଏହି ଉତ୍ସବ। ମହାବାହୁ କାଳିଆ ସାଆନ୍ତେ ଭଉଣୀ ସୁଭଦ୍ରା ଓ ବଡ଼ ଭାଇ ବଳିଆକୁ ଧରି ମନ୍ଦିର ବାହାରକୁ ଚାଲିଆସନ୍ତି । ଭକ୍ତ ଓ ଭଗବାନର ମିଳନସ୍ଥଳ ସ୍ନାନ ମଣ୍ଡପରେ ନିଜର ଅଗଣିତ ଶ୍ରଦ୍ଧାଳୁଙ୍କୁ ଦର୍ଶନ ଦେଇଥାଆନ୍ତି ।
ମହାବାହୁଙ୍କ ସେବାରେ ନିୟୋଜିତ ଥିବା ବ୍ରାହ୍ମଣ ସେବାୟତମାନେ ପ୍ରଥମେ ପୂଜାର୍ଚ୍ଚନା କରିଥିଲେ । ପରେ ଚନ୍ଦନ କାଠରେ ନିର୍ମିତ ଚତୁର୍ଦ୍ଧା ବିଗ୍ରହଙ୍କୁ ସ୍ନାନ ମଣ୍ଡପରେ ମହାନଦୀର ପବିତ୍ର ସୁବାସିତ ଜଳରେ ସ୍ନାନ କରାଯାଇଛି ।
ସ୍ନାନ କରିସାରିବା ପରେ ଦାରୁବ୍ରହ୍ମ ଗଜବେଶ ଧାରଣ କରି ଭକ୍ତ ମାନଙ୍କୁ ଦର୍ଶନ ଦେଇଥିଲେ । ଭଗବାନଙ୍କର ଏପରି ଅପୂର୍ବବେଶକୁ ଦେଖି ଭକ୍ତମାନେ ଭକ୍ତିରେ ବିଭୋର ହୋଇପଡ଼ିଥିଲେ । ଶ୍ରଦ୍ଧାଳୁଙ୍କ ହରିବୋଲ, ହୁଳହୁଳି ସାଙ୍ଗକୁ ନାମକୀର୍ତ୍ତନ ଓ ଶଙ୍ଖଧ୍ବନିରେ ମନ୍ଦିର ପ୍ରାଙ୍ଗଣ ଭକ୍ତିମୟ ହୋଇଉଠିଥିଲା ।
ବୌଦ୍ଧରୁ ସତ୍ଯ ନାରାୟଣ ପାଣି, ଇଟିଭି ଭାରତ
