ବୌଦ୍ଧ: ଦୀର୍ଘ ଦିନ ହେଲା ଅଧାପନ୍ତରିଆ ହୋଇ ପଡିରହିଛି ବୌଦ୍ଧ ହରଭଙ୍ଗାର ଶବଦାହ ଗୃହ । ଏପଟେ ଏହି ଶବଦାହ ଗୃହର ଅର୍ଥକୁ ହଡପ କରାଯାଇଥିବା ଅଭିଯୋଗ କରିଛନ୍ତି ସ୍ଥାନୀୟ ଲୋକେ ।
ସୂଚନା ଅନୁସାରେ, ବୌଦ୍ଧ ଜିଲ୍ଲା ହରଭଙ୍ଗା ବ୍ଲକର ବାମଣ୍ଡା ନିକଟସ୍ଥ ବାଲାଟ ନାଳ ଠାରେ ଦୀର୍ଘ ପାଞ୍ଚ ବର୍ଷ ତଳେ ସରକାରୀ ଅର୍ଥରେ ଏକ ଶବଦାହ ଗୃହର ନିର୍ମାଣ ହୋଇଥିଲା । କିନ୍ତୁ ଉକ୍ତ ଗୃହ ନିମନ୍ତେ ଆସିଥିବା ଅର୍ଥକୁ ଅଧିକ ବିଲ କରି ତତ୍କାଳୀନ ଯନ୍ତ୍ରୀଙ୍କ ଜ୍ଞାତସାରରେ ହଡପ କରାଯାଇଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି ।
ଅଧା ଗଢା ଶବଦାହ ଗୃହର ଅର୍ଥ ଆତ୍ମସାତ ଅଭିଯୋଗ
ଆଉ ଏବେ ଅଧାପନ୍ତରିଆ ହୋଇ ଶବଦାହ ଗୃହଟି ପଡି ଥିବାରୁ ଅଞ୍ଚଳର ଲୋକେ ବାଧ୍ୟ ହୋଇ ନାଳ ଭିତରେ ଶବଦାହ କରୁଛନ୍ତି । କେବେ କେବେ ବର୍ଷା ଯୋଗୁଁ ଅଧାପୋଡା ଶବକୁ ନାଳ ଭିତରେ ଛାଡି ଆସୁଥିବା ବେଳେ ନାଳ ଭିତରେ ଶବଦାହ ଯୋଗୁଁ ପରିବେଶ ମଧ୍ୟ ଦୂଷିତ ହେଉଥିବା ଅଭିଯୋଗ ହୋଇଛି । ତୁରନ୍ତ ଏଦିଗରେ ପ୍ରଶାସନ ଦୃଷ୍ଟି ଦେଇ ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ଦାବି ହୋଇଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
