ବୌଦ୍ଧ: ଖୁଲମଖୁଲା ଚାଲିଛି ଲଘୁ ଖଣିଜ ସମ୍ପଦ ବାଲିର ଚୋରା ଚାଲାଣ । ବୌଦ୍ଧ ଜିଲ୍ଲାର କଣ୍ଟାମାଳ, ବୌଦ୍ଧ ଓ ହରଭଙ୍ଗା ତହସିଲ ଅଧିନରେ କୋଡିଏ ରୁ ଉର୍ଦ୍ଧ୍ବ ବାଲିଘାଟ ରହିଥିଲେ ମଧ୍ୟ ତିନି ତହସିଲ ପକ୍ଷରୁ ମାତ୍ର ତିନି ଜଣ ବ୍ୟକ୍ତି ବିଶେଷଙ୍କୁ ଏହି ବାଲିଘାଟ ସରକାରୀ ଚୁକ୍ତି ଅନୁଯାୟୀ ଅନୁମତି ପ୍ରଦାନ କରାଯାଇଛି ।
କିନ୍ତୁ ଜିଲ୍ଲାର ଅଧିକାଂଶ ବାଲିଘାଟ ସମ୍ପୂର୍ଣ୍ଣ ମୁକୁଳା ପଡିଛି । ସତେଯେମିତି ବାଲି ଲୁଟ ପାଇଁ ମାଫିଆଙ୍କ ପାଇଁ ବାଟ ଖୋଲି ଦିଆଯାଇଛି । ଅଭିଯୋଗ ହେଲେ ରାଜସ୍ୱ ବିଭାଗ ପକ୍ଷରୁ ଧର୍ମକୁ ଆଖିଠାର ଭଳି କେତୋଟି ସ୍ଥାନରେ ଚଢ଼ାଉ କରି ଟ୍ରାକ୍ଟରକୁ ଧରି ଫାଇନ କିଛି କାଟି ଦିଆଯାଏ ।
ଏସବୁ ଅସାଧୁ କାର୍ଯ୍ୟ ରାଜସ୍ବ କର୍ମଚାରୀ ଓ ବାଲି ମାଫିଆଙ୍କ ମିଲିଭଗତରେ ଚାଲିଥିଲେ ମଧ୍ୟ ବିଭାଗ ସବୁ ଜାଣି ମଧ୍ୟ ଦୁର୍ନୀତିକୁ ପରୋକ୍ଷରେ ସମର୍ଥନ ଦେଇ ଚାଲିଛି । ସେପଟେ ବର୍ତ୍ତମାନ ବୌଦ୍ଧ ଜିଲ୍ଲାର ଗୋବିନ୍ଦପୁର, ସାପଦୋହଲି,ଡମ୍ବରୁଗଡ,ବାଉଁଶୁଣୀ, ଅମୁର୍ଡା ଭଳି ମହାନଦୀର ବାଲିଘାଟରୁ ବୀରମହାରାଜପୁର ତହସିଲ କାର୍ଯ୍ୟାଳୟ ରସିଦ ଦେଇ ବାଲି ଚାଲାଣ କରୁଛି ।
ଏ ସମ୍ପର୍କରେ ଇଟିଭି ଭାରତ ପକ୍ଷରୁ ବୀରମହାରାଜପୁର ତହସିଲଦାର ରଞ୍ଜନ କୁମାର ପରିଡାଙ୍କୁ ମୋବାଇଲ ଯୋଗେ ଯୋଗାଯୋଗ କରିବାରୁ ରୋକଠୋକ ମନା କରିଛନ୍ତି। ଏହାସହ ବାଲିଘାଟ କାହାକୁ ଲିଜରେ ପ୍ରଦାନ କରାଯାଇ ନଥିବା କହିଛନ୍ତି । ତେବେ ବାଲିଘାଟରେ ଦିଆଯାଉଥିବା ରସିକ ସମ୍ପର୍କରେ ଏହା ସମ୍ପୂର୍ଣ୍ଣ ନକଲି ଓ ଏନେଇ ଥାନାରେ ଏତଲା ଦିଆଯିବ ବୋଲି କହିଛନ୍ତି । ତେବେ ଏଭଳି ସାଙ୍ଘାତିକ ତଥା ଅନୈତିକ କାର୍ଯ୍ୟ ବୌଦ୍ଧ ଜିଲ୍ଲାର ପରିସୀମା ମଧ୍ୟରେ ଚାଲିଥିଲେ ମଧ୍ୟ କିଭଳି ରାଜସ୍ୱ ବିଭାଗର କର୍ମଚାରୀ ଜାଣି ପାରୁ ନାହାଁନ୍ତି ନା ସବୁ ଜାଣି ପକେଟ ଗରମ କରିବାରେ ଲାଗିଛନ୍ତି ସେନେଇ ଉଠିଛି ପ୍ରଶ୍ନବାଚୀ । ଜିଲ୍ଲାର ବୁଦ୍ଧିଜୀବୀ ଓ ନିର୍ବାଚିତ ଜନ ପ୍ରତିନିଧି ଏନେଇ ତୀବ୍ର ପ୍ରତିକ୍ରିୟା ପ୍ରକାଶ କରିବା ସହ ଏହାର ତଦନ୍ତ ପାଇଁ ଦାବି କରିଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
