ବୌଦ୍ଧ: ଜିଲ୍ଲାର 42 ଗୋଟି ସମବାୟ ସମିତିର କେତେକ ସମିତିରେ ନିର୍ଦ୍ବନ୍ଦରେ ସଭାପତି ନିର୍ବାଚିତ ହୋଇଥିଲା । ଏହା ରବିବାର ଦ୍ବିତୀୟ ପର୍ଯ୍ୟାୟ ନିର୍ବାଚନ ଅନୁଷ୍ଠିତ ହୋଇଥିଲା । ପୋଲିସର କଡା ସୁରକ୍ଷା ମଧ୍ୟରେ ଏହି ସମବାୟ ନିର୍ବାଚନରେ ଧାନକ୍ରୟ ପ୍ୟାକ୍ସ ସହିତ, ବୁଣାକାର, ଦୁଗ୍ଧ, ପନିପରିବା ଭଳି କେତେକ ସମିତିର ସଦସ୍ୟମାନେ ଭୋଟଦାନ କରିଥିଲେ । ରବିବାର ଅନୁଷ୍ଠିତ ସମବାୟ ନିର୍ବାଚନରେ ଜିଲ୍ଲାର ରାମଗଡ,ବହିରା, ବଢିଗାଁ, ମନୁପାଲି ଓ ବିଳାସପୁର ସମବାୟ ସମିତି ଉପରେ ସମସ୍ତଙ୍କ ନଜର ରହିଥିଲା ।
ବହିରା ସମବାୟ ସମିତିର ଦୁଇଟି ଜୋନରେ ହେବ ପୁନଃ ମତଦାନ
ତେବେ ଦ୍ବିତୀୟ ପର୍ଯ୍ୟାୟ ନିର୍ବାଚନରେ ବହିରା ଠାରେ ଦୁଇଟି ଜୋନର ବାଲାଟ ପେପରରେ ତୃଟି ଥିବା କାରଣରୁ ଉକ୍ତ ଦୁଇ ଜୋନରେ ପୁନଃ ମତଦାନ ହେବ ବୋଲି ସୂଚନା ମିଳିଛି । ସେପଟେ ଶନିବାର ମନମୁଣ୍ଡା ଥାନା ଅନ୍ତର୍ଗତ ବିଳାସପୁର ସମବାୟ ସମିତିର ନିର୍ବାଚନକୁ ନେଇ ଦୁଇ ଗୋଷ୍ଠୀ ମଧ୍ୟରେ ଗଣ୍ଡଗୋଳ ଘଟଣାରେ ସାତ ଜଣ ଆହତ ହୋଇଥିବା କାରଣରୁ ରବିବାର ପୋଲିସର କଡା ସୁରକ୍ଷା ମଧ୍ୟରେ ମତଦାନ ଅନୁଷ୍ଠିତ ହୋଇଥିଲା ।
