ବୌଦ୍ଧ: ବିଜୁ ସ୍ବାସ୍ଥ୍ୟ କାର୍ଡ ବଣ୍ଟନ ପାଇଁ ଆସିଥିଲେ ବିଧାୟକ । କିନ୍ତୁ ରାସନ କାର୍ଡରୁ ବଞ୍ଚିତ ହିତାଧିକାରୀଙ୍କ ପ୍ରଶ୍ନ ବାଣରେ ସଭା ସ୍ଥଳରେ ଅପ୍ରୀତିକର ପରିସ୍ଥିତି ସୃଷ୍ଟି ହୋଇଥିଲା ।
ବୌଦ୍ଧ ଜିଲ୍ଲାରେ ଗତ ଗୁରୁବାର ମୁଖ୍ୟମନ୍ତ୍ରୀ ବିଜୁ ସ୍ବାସ୍ଥ୍ୟ ସ୍ମାର୍ଟ କାର୍ଡର ଶୁଭାରମ୍ଭ କରିଥିଲେ । ଆଉ ତାପରଠୁ ଜିଲ୍ଲାର ବିଭିନ୍ନ ପଞ୍ଚାୟତରେ ଏହି କାର୍ଡ ହିତାଧିକାରୀଙ୍କୁ ବଣ୍ଟନ କରାଯାଉଛି । ବାଉଁଶୁଣୀ ପଞ୍ଚାୟତ ଠାରେ କଣ୍ଟାମାଳ ବିଧାୟକ ମହୀଧର ରଣା ବିଳମ୍ବିତ ସମୟରେ ଉକ୍ତ କାର୍ଡ ବଣ୍ଟନ ପାଇଁ ପହଞ୍ଚିଥିଲେ ।
ତେବେ ଏହି କାର୍ଡ ବଣ୍ଟନ ପାଇଁ ସଭା ଚାଲିଥିବାବେଳେ ହଠାତ କିଛି ହିତାଧିକାରୀ ସେମାନେ ରାସନ କାର୍ଡରୁ ବାଦ ପଡିଥିବା ନେଇ ଅଭିଯୋଗ କରି ହଟ୍ଟଗୋଳ ଆରମ୍ଭ କରିଥିଲେ । ଫଳରେ ସେଠାରେ ଏକ ଅପ୍ରୀତିକର ପରିସ୍ଥିତି ସୃଷ୍ଟି ହୋଇଥିଲା ।
ବାଉଁଶୁଣୀ ପଞ୍ଚାୟତର ଅନେକ ହିତାଧିକାରୀ ରାସନ କାର୍ଡ ପାଇବାରୁ ବଞ୍ଚିତ ଥିବା ଅଭିଯୋଗ ହୋଇଥିବାରୁ କଣ୍ଟାମାଳ ବିଧାୟକ ତୁରନ୍ତ ଏଦିଗରେ ପଦକ୍ଷେପ ଗ୍ରହଣ ପାଇଁ ବିଡ଼ିଓ ଓ ଯୋଗାଣ ବିଭାଗକୁ ତାଗିଦ କରିଥିବା ସୂଚନା ମିଳିଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
