ବୌଦ୍ଧ: ଗୋଟେ ପଟେ କୋରୋନା ଦୁଃଖ, ଅନ୍ୟପଟେ ଦାଉ ସାଧୁଛି ପ୍ରକୃତି । ମହାମାରୀରେ ସବୁଠାରୁ ଅଧିକ କ୍ଷତିଗ୍ରସ୍ତ ହେଉଥିବା ଚାଷିକୂଳ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଥିବାବେଳେ ଏବେ ବୌଦ୍ଧରେ ଏକ ଚିତ୍ର ସାମନାକୁ ଆସିଛି । ଯେଉଁଠି ପ୍ରବଳ ବର୍ଷା ଯୋଗୁଁ ପରିବା ବଜାରରେ ପାଣି ପସି ଯିବାରୁ ମାଗଣାରେ ପରିବା ବିକ୍ରି କରି ଘରକୁ ଫେରିଛନ୍ତି ଚାଷୀ ।
ସୂଚନା ମୁତାବକ , ବୌଦ୍ଧ ପୌରାଞ୍ଚଳର ପରିବା ବଜାରରେ ଭିଡ କମାଇବାକୁ ପୌର ପ୍ରଶାସନ ତିନୋଟି ସ୍ଥାନରେ ପରିବା ବଜାର ଆଜିଠାରୁ ଆରମ୍ଭ କରିଥିଲା । କିନ୍ତୁ ଆଜି ପ୍ରବଳ ବର୍ଷା ହେବାରୁ ବଜାର ଭିତରେ ପାଣି ପସିଯାଇ ବଜାରର ଅବସ୍ଥା ବେହାଲ କରିଦେଲା ।
ସେପଟେ ଏହି କିଛିଦିନ ଧରି ପରିବା ଦର ଆକାଶ ଛୁଆଁ ହୋଇଥିବା ବେଳେ ଆଜି 5 ଟଙ୍କାରେ ମଧ୍ୟ ବିକ୍ରି ହେଲା ନାହିଁ । ଶେଷରେ ପରିସ୍ଥିତି ଏପରି ହେଲା ଯେ ଚାଷୀ ପରିବା ଗୁଡିକୁ ଘରକୁ ଫେରାଇ ନନେଇ ବଜାରରେ ଉପସ୍ଥିତ ଲୋକଙ୍କୁ ମାଗଣାରେ ବାଣ୍ଟି ଦେଲେ । ତେବେ ବଜାରର ଅବସ୍ଥା ଉପରେ ଦୃଷ୍ଟି ଦେବାକୁ ଚାଷୀ ମାନେ ଦାବୀ କରିଛନ୍ତି ।
ବୌଦ୍ଧ ରୁ ସତ୍ୟ ନାରାୟଣ ପାଣି, ଇଟିଭି ଭାରତ
