ବୌଦ୍ଧ: କୋରୋନା ମହାମାରୀ ତଥା ଲକଡାଉନ ଯୋଗୁଁ ସାଧାରଣ ଜନଜୀବନ ଅସ୍ତବ୍ୟସ୍ତ ହୋଇପଡିଛି । ଜୀବନ ଜୀବିକାକୁ ନେଇ ସଂଘର୍ଷ ଜାରି ରହିଥିବାବେଳେ ମାଇକ୍ରୋ ଫାଇନାନ୍ସ କମ୍ପାନୀର ଦୌରାତ୍ମ୍ୟରେ ଅତିଷ୍ଠ ମହିଳା ଗୋଷ୍ଠୀ । ବୌଦ୍ଧ ଜିଲ୍ଲାର ବିଭିନ୍ନ ସ୍ଥାନରେ କୋଡିଏରୁ ଊର୍ଦ୍ଧ୍ବ ମାଇକ୍ରୋ ଫାଇନାନ୍ସ କମ୍ପାନୀ ସେମାନଙ୍କ ଦପ୍ତର ଖୋଲି ମହିଳା ଗୋଷ୍ଠୀଙ୍କୁ ଫାଇନାନ୍ସ କରିବା ନାଁରେ ବ୍ୟାପକ ଅର୍ଥ ଶୋଷଣ କରୁଥିବା ଅଭିଯୋଗ ହୋଇଛି ।
କିସ୍ତି ଅସୁଲ ନାଁରେ କମ୍ପାନୀ କର୍ମଚାରୀ ମହିଳାଙ୍କୁ ଅଶୋଭନୀୟ ବ୍ୟବହାର ସହିତ ମାନସିକ ଭାବରେ ଭୟଭୀତ କରି ଅର୍ଥ ଆଦାୟ କରୁଛନ୍ତି । ଲକଡାଉନ ସମୟରେ ଲୋକଙ୍କ ଆର୍ଥିକ ମାନଦଣ୍ଡ ହ୍ରାସ ପାଇଥିବାବେଳେ କମ୍ପାନୀ ଗୁଡିକର କିସ୍ତି ଆଦାୟର ଜୋର ଜୁଲୁମରେ ଅତିଷ୍ଠ ହୋଇ ଆଜି ବୌଦ୍ଧ ଜିଲ୍ଲା ସାମ୍ପୋଚ ଠାରେ ଶତାଧିକ ମହିଳା ଏକତ୍ରିତ ହୋଇ ଆନ୍ଦୋଳନ କରିବାକୁ ଚରମ ନିଷ୍ପତ୍ତି ଗ୍ରହଣ କରିଛନ୍ତି ।
ଏନେଇ ବୁଦ୍ଧିଜୀବୀ ମଧ୍ୟ ମାଇକ୍ରୋ ଫାଇନାନ୍ସ କମ୍ପାନୀର ଏଭଳି ଅମାନବୀୟ ଅର୍ଥ ସଂଗ୍ରହର ମାଧ୍ୟମକୁ ଦୃଢ ନିନ୍ଦା କରିବା ସହ ଏ ଦିଗରେ ସରକାର ତୁରନ୍ତ ପଦକ୍ଷେପ ଗ୍ରହଣ କରିବାକୁ ଦାବି କରିଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
