ବୌଦ୍ଧ: ରାଜ୍ୟ ବିଜେଡି ସଂଗଠନ ସଂପାଦକଙ୍କ ଅଚାନକ ବୌଦ୍ଧ ଗସ୍ତ । ମଙ୍ଗଳବାର ରାଜ୍ୟ ବିଜେଡି ସଂଗଠନ ସଂପାଦକ ପ୍ରଣବ ପ୍ରକାଶ ଦାସ ବୌଦ୍ଧରେ ପହଞ୍ଚି ଜିଲ୍ଲାର ଐତିହ୍ୟ, ସଂସ୍କୃତି ଓ ପରମ୍ପରାର ପ୍ରାଣକେନ୍ଦ୍ର ଜିଲ୍ଲା ସଂଗ୍ରହାଳୟକୁ ବୁଲି ଦେଖିବା ସହ ସଂଗ୍ରହାଳୟ ପରିସରରେ ଖୋଲାଯାଇ ଥିବା ସ୍ଥାନୀୟ ପାରମ୍ପରିକ ଖାଦ୍ୟ ମଧ୍ୟ ଖାଇଥିଲେ । ବୌଦ୍ଧ ଜିଲ୍ଲାର ପାରମ୍ପରିକ ଖାଦ୍ୟ ମୁଢିଲଡୁ,ଜନାଲଡୁ, ଆରିସା ପିଠା, ମଣ୍ଡା ପିଠା, ଚାଉଲବରା, ଖିରମନ ଓ ସର୍ବୋପରି ସୁସ୍ବାଦୁ ଖାଦ୍ୟର ସମ୍ଭାର ଜିଲ୍ଲା ସଂଗ୍ରହାଳୟ ପରିସରରେ ଉପଲବ୍ଧ ଥିବାରୁ ଦାସ ଜିଲ୍ଲା ପ୍ରଶାସନକୁ ଅଭିନନ୍ଦନ ଜଣାଇଥିଲେ ।
ଦାସଙ୍କ ସହିତ ରାଜ୍ୟ ଯୋଜନା ବୋର୍ଡ ଉପାଧ୍ୟକ୍ଷ ସଞ୍ଜୟ ଦାସବର୍ମା, ବରିଷ୍ଠ ବିଜେଡି ନେତା ବିଜୟ ନାଏକ, ବୌଦ୍ଧ ବିଧାୟକ ପ୍ରଦୀପ କୁମାର ଅମାତ ପ୍ରମୁଖ ସଂଗ୍ରହାଳୟ ପରିସରକୁ ବୁଲି ଦେଖିଥିଲେ । ତେବେ ପ୍ରଣବ ପ୍ରକାଶ ଦାସଙ୍କ ଗସ୍ତ ଆସନ୍ତା ଦିନରେ ବୌଦ୍ଧ ଜିଲ୍ଲା ପାଇଁ ଏକ ଖୁସିର ଖବର ଆଣିବା ନେଇ ବିଶ୍ବସ୍ତ ସୂତ୍ରରୁ ଜଣାପଡ଼ିଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
