ବୌଦ୍ଧ: ପାନୀୟ ଜଳ ପାଲଟିଛି ଜହର । ଜଳ ନ ପାଇଁ ଲୋକେ ଗାଁ ଛାଡୁଥିବା ଅଭିଯୋଗ । ଏଭଳି ଅଭିଯୋଗ ଆସିଛି ବୌଦ୍ଧ ଜିଲ୍ଲା ହରଭଙ୍ଗା ବ୍ଲକ ଅନ୍ତର୍ଗତ ବରଝୁଲି ଗାଁରୁ । ଫ୍ଲୋରାଇଡ ଯୁକ୍ତ ପାଣି ଓ ଜଳସ୍ତର ହ୍ରାସ ଯୋଗୁଁ ପାନୀୟ ଜଳ ଯୋଗାଣ ପାଇଁ ବାରମ୍ବାର ଅଭିଯୋଗ ପରେ କୌଣସି ସୁଫଳ ନମିଳିବାରୁ କିଛି ଲୋକ ଗାଁ ଛାଡୁଥିବା ଗ୍ରାମବାସୀ ଅଭିଯୋଗ କରିଛନ୍ତି ।
ଗାଁରେ ଥିବା ପନ୍ଦରଟି ନଳକୂପ ମଧ୍ୟରୁ ବାରଟି ନଳକୂପ ସମ୍ପୂର୍ଣ୍ଣ ବ୍ୟବହାର ଉପଯୋଗୀ ହୋଇନଥିବା ବେଳେ ଅନ୍ୟ 3ଟିରୁ ମଧ୍ୟ ଅପରିଷ୍କାର ପାଣି ବାହାରୁଛି । ଗାଁର କୂଅ ମଧ୍ୟ ବ୍ୟବହାର ଉପଯୋଗୀ ହୋଇନଥିବାରୁ ଗାଁ ଲୋକେ ବାଧ୍ୟ ହୋଇ ଦୂରଦୂରାନ୍ତରୁ କିମ୍ବା ପଡୋଶୀ ଗାଁରୁ ପାନୀୟ ଜଳ ବୋହି ଆଣୁଛନ୍ତି । ଏ ସମ୍ପର୍କରେ ଗ୍ରାମବାସୀ ପଞ୍ଚାୟତ ଠାରୁ ଆରମ୍ଭ କରି ବ୍ଲକ ଓ ଜିଲ୍ଲା ପ୍ରଶାସନ ପର୍ଯ୍ୟନ୍ତ ସବୁଠାରେ ଗୁହାରି କଲେ ମଧ୍ୟ କୌଣସି ସୁଫଳ ମିଳୁ ନଥିବା ଅଭିଯୋଗ କରିଛନ୍ତି । ଖୁବ ଶିଘ୍ର ଟ୍ୟାଙ୍କର ଯୋଗେ ଗ୍ରାମବାସୀଙ୍କୁ ପାନୀୟ ଜଳ ଯୋଗାଇ ଦିଆଯିବ ବୋଲି ସ୍ଥାନୀୟ ସରପଞ୍ଚ କହିଛନ୍ତି ।
ବୌଦ୍ଧରୁ ସତ୍ୟନାରାୟଣ ପାଣି, ଇଟିଭି ଭାରତ
