ବୌଦ୍ଧ: ଜିଲ୍ଲାର ଉପାନ୍ତ ତଥା ଆଦିବାସୀ ଅଧ୍ୟୁଷିତ ପଞ୍ଚାୟତ ସଦର ମହକୁମା ତଳଗାଁରେ ରହିଛି ସରକାରୀ ଉଚ୍ଚ ବିଦ୍ୟାଳୟ ଓ ଆଦିବାସୀ ଛାତ୍ରୀ ନିବାସ । ଏଠାରେ ଗତ ଗୁରୁବାର ଦିନ 7 ଜଣ ଛାତ୍ରୀଙ୍କର ହଠାତ ପେଟ ବ୍ୟଥା, ବେକ ଓ ମୁଣ୍ଡ ବିନ୍ଧା ଆରମ୍ଭ ହୋଇଥିଲା । ତେବେ ଭୌତିକ କାଣ୍ଡ ଘଟିଥିବା ଯୋଗୁଁ ଏଭଳି ଘଟିଥିବା ସନ୍ଦେହ କରାଯାଉଥିବାବେଳେ ଏହାର ସତ୍ୟାସତ୍ୟ ଜାଣିବା ପାଇଁ ବିଦ୍ୟାଳୟରେ ପହଞ୍ଚିଥିଲା ଇଟିଭି ଭାରତ ଟିମ ।
ଏହାର ପ୍ରକୃତ କାରଣ ଭୂତପ୍ରେତ, ଶାରୀରିକ ଅସୁସ୍ଥତା କି ମାନସିକ ଦୁର୍ବଳତା ? ଘଟଣା ଜଣାପଡିଲା ପରେ ବୌଦ୍ଧ ଜିଲ୍ଲା ପ୍ରଶାସନ ଓ ସ୍ବାସ୍ଥ୍ୟ ବିଭାଗ ତତ୍ପରତା ପ୍ରକାଶ କରି ଛାତ୍ରୀଙ୍କ ସ୍ବାସ୍ଥ୍ୟ ପରୀକ୍ଷା ସହ ଚିକିତ୍ସା କରିଥିଲେ । ଛାତ୍ରୀ ନିବାସକୁ ଦୁଇ ଜଣ ଗୁଣିଆଙ୍କୁ ଡକାଯାଇ ଛାତ୍ରୀଙ୍କୁ ଝଡାଫୁଙ୍କା କରି ପରେ ନିଜନିଜ ଘରକୁ ପଠାଇ ଦିଆଯାଇଥିଲା ।
ଏବେ ଡାକ୍ତରୀ ଚିକିତ୍ସା ଚାଲିଥିବାବେଳେ ସବୁ କିଛି ବାହାରକୁ ଠିକ ଲାଗୁଛି । କିନ୍ତୁ ଏବେ ସବୁଠାରୁ ବଡ଼ ପ୍ରଶ୍ନ ଉଠିଛି ଯେ ଅତ୍ୟାଧୁନିକ ବିଜ୍ଞାନ ଯୁଗରେ ଗୋଟିଏ ସରକାରୀ ବିଦ୍ୟାଳୟରେ ଏଭଳି ଅଭାବନୀୟ ପରିସ୍ଥିତି ପାଇଁ ଦାୟୀ କିଏ ? କାହିଁକି ଓ କେଉଁ ପରିସ୍ଥିତିରେ ଗୁଣିଆଙ୍କୁ ଛାତ୍ରୀଙ୍କ ଦେହରୁ ଭୂତପ୍ରେତ ଝଡାଫୁଙ୍କା କରିବାକୁ ଦିଆଗଲା ।
ଏତେସବୁ ମଧ୍ୟରେ ସୋମବାର ଇଟିଭି ଭାରତକୁ ପ୍ରତିକ୍ରିୟା ଦେଇଛନ୍ତି ଛାତ୍ରୀ ନିବାସରେ ରହୁଥିବା ମହିଳା ରୋଷେୟା । ସେଠାରେ କୌଣସି ଭୟ ନଥିବା ସେ କହିଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
