ବୌଦ୍ଧ : ସାଧାରଣ ଲୋକଙ୍କ ନିକଟରେ ସରକାରଙ୍କ ବିଭିନ୍ନ ଯୋଜନା ପହଞ୍ଚାଇବାରେ ବିଭାଗର ରହିଛି ପ୍ରମୁଖ ଭୂମିକା। କିନ୍ତୁ ବୌଦ୍ଧରେ ଦେଖାଦେଇଛି କିଛି ଭିନ୍ନ ଦୃଶ୍ୟ। ଲୋକଙ୍କ ସୁବିଧା ପାଇଁ ଗାଁରେ ଥିବା ପଞ୍ଚାୟତ ଅଫିସରେ ପଡିଛି ତାଲା। କର୍ମଚାରୀଙ୍କ ଅଭାବ ହେଉ ଅବା ଅନ୍ୟ କୌଣସି ସମସ୍ୟା ଯୋଗୁଁ ପଞ୍ଚାୟତରେ ତାଲା ଝୁଲୁଛି। ଆଉ ଏଥିପାଇଁ ସାଧାରଣ ଲୋକ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । କେତେକ ନିର୍ଦ୍ଦିଷ୍ଟ ପଞ୍ଚାୟତରେ ଏଭଳି ସମସ୍ୟା ଲାଗି ରହିଥିବା ଦେଖା ଦେଇଛି।
ବୌଦ୍ଧ ଜିଲ୍ଲାର କୌଣସି ଉପାନ୍ତ ପଞ୍ଚାୟତ କଥା ଛାଡନ୍ତୁ, ଗମନାଗମନର ସୁବ୍ୟବସ୍ଥା ଥିବା ପଞ୍ଚାୟତ କାର୍ଯ୍ୟାଳୟ ଗୁଡିକରେ କାର୍ଯ୍ୟ ଦିବସରେ ତାଲା ଝୁଲୁଥିବାରୁ ଜନ ଅସନ୍ତୋଷ ପ୍ରକାଶ ପାଇଛି। ଜିଲ୍ଲାର ତିନୋଟି ବ୍ଲକରେ ରହିଛି ୬୯ ଗୋଟି ପଞ୍ଚାୟତ।କେଉଁଠି ଜଣେ ପଞ୍ଚାୟତ ନିର୍ବାହୀ ଅଧିକାରୀ ତିନୋଟି କିମ୍ବା ଚାରୋଟି ପଞ୍ଚାୟତ ଦାୟିତ୍ୱରେ ରହିଛନ୍ତି ତ ଅନ୍ୟ କେଉଁଠି ସରପଞ୍ଚଙ୍କ ଇଚ୍ଛା ଅନୁସାରେ କୁଆଡେ ପଞ୍ଚାୟତ ଖୋଲାଯାଏ। କିନ୍ତୁ ପ୍ରାୟ ସମୟରେ ସାଧାରଣ ଲୋକ ପଞ୍ଚାୟତକୁ ଆସି ଫେରି ଯାଉଥିବା ଅଭିଯୋଗ ହୋଇଛି।
କେତୋଟି ପଞ୍ଚାୟତରେ ସରପଞ୍ଚ ଓ ସରକାରୀ କର୍ମଚାରୀଙ୍କ ମଧ୍ୟରେ ତାଳମେଳ ଠିକ ରହୁନଥିବା କାରଣରୁ ମଧ୍ୟ ଏଭଳି ସ୍ଥିତି ଉପୁଜିଥିବା ଆଲୋଚନା ହେଉଛି। ଅନ୍ୟପକ୍ଷରେ ନିର୍ବାଚନ ଆଚରଣବିଧି ଲାଗୁ ହୋଇଥିଲେ ମଧ୍ୟ ପଞ୍ଚାୟତ ଅଞ୍ଚଳରେ ସରକାରୀ ବିଜ୍ଞାପନ ଅଦ୍ୟାବଧି ରହିଛି।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
