ବୌଦ୍ଧ: ବୌଦ୍ଧ ଜିଲ୍ଲାରେ ଧିମେଇ ଯାଇଛି ଖରିଫ ଋତୁ ଧାନ ସଂଗ୍ରହ ପ୍ରକ୍ରିୟା । ଜିଲ୍ଲାର ମଣ୍ଡି ମାନଙ୍କରେ ମିଲର୍ସଙ୍କ ମର୍ଜିରେ ଧାନ ଉଠାଣ ହେଉଥିବାବେଳେ ଅନେକ ମଣ୍ଡିରେ ମିଲର୍ସ ଧାନ ଉଠାଉ ନଥିବା ଅଭିଯୋଗ କରିଛନ୍ତି ଚାଷୀ ।
ମଣ୍ଡି ସମସ୍ୟା ଚାଷୀଙ୍କ ସମସ୍ୟାର ମୁଖ୍ୟ କାରଣ ପାଲଟିଛି । ଏସବୁ ଭିତରେ ଶୀତ କାକରରେ ଉପାର୍ଜିତ ଧାନକୁ ଜଗି ମଣ୍ଡିରେ ପଡି ରହିଛି ଚାଷୀ । କେତେକ ମଣ୍ଡିରେ ପାନୀୟଜଳ, ବିଦ୍ୟୁତ ଏପରିକି ଧାନ ମାନ ପରୀକ୍ଷା ଯନ୍ତ୍ର ମଧ୍ୟ କାମ କରୁନାହିଁ । ଚାଷୀ ଟୋକନ ପାଇବାର ମାସେ ପରେ ମଧ୍ୟ ମଣ୍ଡିରେ ଧାନ ବିକ୍ରି କରିପାରୁ ନଥିବାରୁ ବାଧ୍ୟ ହୋଇ ବେପାରୀ ହାବୁଡ଼ରେ ପଡୁଛନ୍ତି । ବର୍ତ୍ତମାନ ଅନେକ ଚାଷୀ ବେପାରୀ ଓ ଦଲାଲଙ୍କ କବ୍ଜାରେ ରହି ହନ୍ତସନ୍ତ ହେଉଛନ୍ତି।
ଚାଷୀର ଧାନ ଉଠିପାରୁ ନଥିବା ଯୋଗୁଁ ମଙ୍ଗଳବାର ମନୁପାଲି ଅଞ୍ଚଳର ଉତ୍ୟକ୍ତ ଚାଷୀ ଜମଟାଙ୍ଗୀ ଠାରେ 57 ନମ୍ବର ଜାତୀୟ ରାଜପଥ କୁ ଦୀର୍ଘ ସମୟ ଧରି ଅବରୋଧ କରିଥିଲେ । ଗୋଟିଏ ପଟରେ ଚାଷୀର ଧାନ ମଣ୍ଡିରୁ ଉଠିପାରୁ ନଥିବା ବେଳେ ଯେଉଁ ଚାଷୀର ଧାନ ଉଠୁଛି ତାକୁ ପାଞ୍ଚରୁ ଦଶ କିଲୋ ପର୍ଯ୍ୟନ୍ତ କଟନୀ ଛଟନୀର ସମ୍ମୁଖୀନ ହେଉଛନ୍ତି ।
ଆଉ ଏଭଳି କାର୍ଯ୍ୟ ସମବାୟ ବିଭାଗ ଓ ଯୋଗାଣ ବିଭାଗର ଜ୍ଞାତସାରରେ ଚାଲିଥିବା ନେଇ ଅଭିଯୋଗ କରିଛନ୍ତି । ଏନେଇ ଜିଲ୍ଲା ପ୍ରଶାସନ ଦୃଷ୍ଟି ଦେଇ ବିହିତ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ଦାବି କରିଛନ୍ତି ବୌଦ୍ଧ ଜିଲ୍ଲାର ଶତାଧିକ ଚାଷୀ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
