ବୌଦ୍ଧ: ଆଜି ପବିତ୍ର ସାବିତ୍ରୀ ଅମାବାସ୍ୟା । ସ୍ବାମୀ ଯେଉଁଠି ଥାଉ, ଯେଭଳି ଥାଉ, ତାର ସୁଖ କାମନା କରିଥାଏ ପତ୍ନୀ । ତେଣୁ ଆଜିର ଏହି ପବିତ୍ର ଦିନରେ କିପରି ଦୁଇ ଜଣ ମହିଳା ସେମାନଙ୍କ ସ୍ବାମୀଙ୍କ ସୁଖ ମନାସୁଛନ୍ତି ତାହାର ଦୁଇଟି ଦୃଶ୍ୟ ଆମେ ଦେଖାଇବୁ ।
ପ୍ରଥମ ମହିଳା ଜଣଙ୍କ ହେଲେ ସ୍ବାମୀ ପରିତ୍ୟକ୍ତା ବେଟିଖାଇ ରଣା । ପ୍ରାୟ ସାତ ବର୍ଷ ହେଲା ସନ୍ତାନ ନହେବାରୁ ସ୍ବାମୀ ହୃଦାନନ୍ଦ ରଣା ତାଙ୍କୁ ଛାଡି ଦେଇ ଅନ୍ୟ ଗ୍ରାମରେ ବାସ କରୁଛନ୍ତି । ତେଣୁ ସେ ଦେବଗଡ ଗ୍ରାମରେ ନିସଙ୍ଗ ଜୀବନଯାପନ କରୁଥିଲେ ମଧ୍ୟ ଆଜି ସାବିତ୍ରୀ ଅମାବାସ୍ୟାରେ ନିଜ ସ୍ବାମୀଙ୍କ ମଙ୍ଗଳ କାମନା କରି ସ୍ଥାନୀୟ ବାଙ୍କମୁଣ୍ଡି ଦେବୀଙ୍କ ନିକଟରେ ଗୁହାରି ଜଣାଇଛନ୍ତି ।
ସେହିପରି ଦ୍ବିତୀୟ ମହିଳା ଜଣଙ୍କ ହେଲେ ପଦ୍ମନପୁର ଗ୍ରାମର ଦୀପାଞ୍ଜଳି ପ୍ରଧାନ । ଅଳ୍ପ ଦିନ ତଳେ ବିବାହ ହୋଇଥିଲେ ମଧ୍ୟ କୌଣସି କାରଣରୁ ତାଙ୍କ ସ୍ବାମୀ ଶିଳାଦିତ୍ୟ ବୌଦ୍ଧ ଜେଲରେ ବନ୍ଦୀ ହୋଇ ଅଛନ୍ତି । ତେଣୁ ଆଜିର ଏହି ପବିତ୍ର ଦିନରେ ସେ ବୌଦ୍ଧ ଜେଲକୁ ଯାଇ ସ୍ବାମୀଙ୍କ ଆଶିର୍ବାଦ ନେବା ସହ ଠାକୁରଙ୍କ ପାଖରେ ତାଙ୍କ ମଙ୍ଗଳ କାମନା କରିଥିଲେ ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
