ଭୁବନେଶ୍ବର: ବିପଦରେ ବନ୍ୟଜନ୍ତୁ । ଓଡ଼ିଶାରେ ଲୋପ ପାଇବାକୁ ବସିଲାଣି ମହାବଳ ବାଘଙ୍କ ବଂଶ । ଏସଟିଏଫ ଟିମ ଦ୍ବାରା ୨୦୨୨ରେ ୧୪ଟି ବାଘଛାଲ ଜବତ କରାଯାଇଥିବାବେଳେ ଏବେ ୨୦୨୩ ବର୍ଷ ଆରମ୍ଭରୁ ବୌଦ୍ଧରେ ଦୁଇଟି ବାଘଛାଲ ଜବତ କରାଯାଇଛି । ତେବେ ଏହି ଘଟଣାରେ ଜଣେ ଅଭିଯୁକ୍ତକୁ ପୋଲିସ ଗିରଫ କରିଥିବାବେଳେ ଅନ୍ୟଜଣେ ଅଭିଯୁକ୍ତ ଘଟଣାସ୍ଥଳରୁ ଫେରାର ହୋଇଯାଇଥିବା ଜଣାପଡ଼ିଛି ।
ସୂଚନା ଅନୁସାରେ ବୌଦ୍ଧରେ ବାଘଛାଲ ଡିଲ ବେଳେ ଏସଟିଏଫ ଟିମ ଜବତ କରିଛି ଦୁଇଟି ବାଘଛାଲ । ହିମାଳୟ ଦାସ ନାମକ ଅଭିଯୁକ୍ତ ଧରାପଡିଥିବା ବେଳେ ଜଣେ ଫେରାର ହୋଇଛି । ଯେଉଁଥିରେ ଗୋଟିଏ ମହାବଳ ବାଘଛାଲ ସହ ଗୋଟିଏ କଲରାପତରିଆ ବାଘଛାଲ ଜବତ କରାଯାଇଛି । ତେବେ ୧୦ ଲକ୍ଷ ଟଙ୍କାରେ ଏହି ବାଘଛାଲ ଡିଲ ହେଉଥିବା ଏସଟିଏଫ ଏସପି ସୂଚନା ଦେଇଛନ୍ତି । ତେବେ ବାରମ୍ବାର ଏପରି ବାଘଛାଲ ଜବତ ହେବା ପରେ ଏହା ପଛର ମାଷ୍ଟରମାଇଣ୍ଡ ସାମ୍ନାକୁ ଆସୁନାହାନ୍ତି । ଦୁଇ ବର୍ଷରେ ଦୁଇଟି ମହାବଳ ବାଘ ଅର୍ଥାତ ରୟାଲ ବେଙ୍ଗଲ ଟାଇଗର ଜବତ ହେବା ଏବେ ଚିନ୍ତାର ବିଷୟ ପାଲଟିଛି । ତେବେ ଏନେଇ ଜଙ୍ଗଲ ସୁରକ୍ଷାରେ ଥିବା ଫରେଷ୍ଟ ଅଧିକାରୀ ଓ ଏସଟିଏଫଙ୍କ ଦୃଷ୍ଟି ସତ୍ତ୍ବେ ଏହା ଉପରେ ରୋକ ଲାଗିପାରୁନି । ତେବେ ଏନେଇ ବନ୍ୟପ୍ରାଣୀ ଅଧିକାରୀଙ୍କ ପ୍ରତିକ୍ରିୟା ମିଳିପାରିନାହିଁ ।
ଇଟିଭି ଭାରତ, ଭୁବନେଶ୍ବର
