ବୌଦ୍ଧ: ଆସନ୍ତା ଭାଦ୍ରବ ପଞ୍ଚମୀରେ ଲାଗି ହେବ ନବାନ୍ନ । ଏନେଇ ଧାର୍ଯ୍ୟ ହୋଇଛି ଲଗ୍ନ । ବୌଦ୍ଧ ଜିଲ୍ଲାର ଇଷ୍ଟଦେବୀ ମା ଭୈରବୀଙ୍କ ପୀଠରେ ଆସନ୍ତା ମଙ୍ଗଳବାର ଲାଗି ହେବ ପବିତ୍ର ନବାନ୍ନ । ଆଉ ଏଥିପାଇଁ ଚଳଚଞ୍ଚଳ ହୋଇ ଉଠିଛି ସମଗ୍ର ଜିଲ୍ଲା । କାରଣ ପୁଣି ଆସିଛି ନୂଆଁଖାଇ ।
ଗଣ ପର୍ବ ପାଳିବା ଲାଗି ପୁଣି ଏକାଠି ହେଲେଣି ପଶ୍ଚିମ ଓଡ଼ିଶାବାସୀ । ଗାଁରୁ ସହର ସବୁଠି ଆରମ୍ଭ ହୋଇଯାଇଛି ପ୍ରସ୍ତୁତି । ଆଉ ଦୁଇ ଦିନ ବାକି ଥିବାରୁ ଘର ଲିପାପୋଛା, ଗ୍ରାମ ଦେବତୀଙ୍କ ପୀଠକୁ ସଫାସୁତୁରା କରିବାରେ ଲାଗିଛନ୍ତି ଗୃହିଣୀ । ନୂଆ ଲୁଗା, ଚାଉଳ ଚୂନା, ଗୁଡା ଆଦି ସାମଗ୍ରୀର ଯୋଗାଡ ସହ ଗାଁ କିମ୍ବା ବଜାରରୁ ନୂଆ ଧାନ ସଂଗ୍ରହ କରିବାରେ ଲାଗିଛନ୍ତି ପରିବାରଲୋକେ ।
ଏପଟେ ଆସନ୍ତା ପଞ୍ଚମୀ ଦିନ ସକାଳ ସାଢେ 8ଟାରୁ 10ଟା 10 ମିନିଟରେ ଦେବୀ ଭୈରବୀଙ୍କ ନିକଟରେ ନବାନ୍ନ ଲାଗି ହେବାକୁ ଧାର୍ଯ୍ୟ କରାଯାଇଛି । ଏହି ଉପଲକ୍ଷେ ବୌଦ୍ଧ, ବାଉଁଶୁଣୀ, ମନମୁଣ୍ଡା, ପଲଶାଗୋରା, କଣ୍ଟାମାଳ ଓ ଘଣ୍ଟାପଡା ଆଦି ସ୍ଥାନରେ ସ୍ବତନ୍ତ୍ର କାର୍ଯ୍ୟକ୍ରମର ଆୟୋଜନ କରାଯାଇଛି । ବିଶେଷ ଭାବରେ ରାଜ୍ୟ ବାହାରେ କାମ କରୁଥିବା ପରିବାରଲୋକେ ଏହି ସମୟରେ ଘର ବାହୁଡା କରୁଛନ୍ତି । ଗୋଟିଏ ଦିନ ପରେ ଏହି ମହାନ ଗଣପର୍ବ ହେବାକୁ ଥିବାବେଳେ ବିଭିନ୍ନ ସ୍ଥାନରେ ସାଂସ୍କୃତିକ କାର୍ଯ୍ୟକ୍ରମର ଆୟୋଜନ କରାଯାଇଛି ।
ବୌଦ୍ଧରୁ ସତ୍ୟନାରାୟଣ ପାଣି, ଇଟିଭି ଭାରତ
