ବୌଦ୍ଧ: ମାମୁଁ ଘରକୁ ବୁଲିବାକୁ ଆସି ପୋଖରୀରେ ବୁଡି ଭଣଜା ମୃତ । ଏଭଳି ଏକ ଅଭାବନୀୟ ଘଟଣା ବୌଦ୍ଧ ଜିଲ୍ଲା ବଢିଗାଁରେ ଘଟିଛି । ମାମୁଁ ଘରକୁ ବୁଲିଆସି ଗାଁ ପୋଖରୀରେ ବୁଡିଯାଇ ଭଣଜାର ଅକାଳ ମୃତ୍ୟୁ ଘଟିଛି । ପୋଲିସ ଏନେଇ ଏକ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଜାରି ରଖିଛି ।
ସୂଚନା ଅନୁଯାୟୀ ଜିଲ୍ଲାର ରାଉତବାହାଲ ଗ୍ରାମର ଆଠ ବର୍ଷର ନାବାଳକ ଆକାଶ ପ୍ରଧାନ ନିଜ ମାମୁଁ ଘର ବଢିଗାଁ ଟିକିରାସାହିକୁ ବୁଲିବାକୁ ଆସିଥିଲା । ତେବେ ରବିବାର ଛୁଟି ଥିବାରୁ ଆକାଶ ନିଜ ଆଇ ସହିତ ଗାଁ ପୋଖରୀକୁ ଗାଧୋଇବା ପାଇଁ ଯାଇଥିଲା । ଆଇର ଅଜାଣତରେ ଆକାଶ ଅସାବଧାନତା ଯୋଗୁଁ ପୋଖରୀରେ ବୁଡି ଯାଇଥିଲା । ଦୀର୍ଘ ସମୟ ଖୋଜାଖୋଜି ପରେ ଆକାଶକୁ ମୁର୍ମୂଷୁ ଅବସ୍ଥାରେ ଉଦ୍ଧାର କରି ବୌଦ୍ଧ ମୁଖ୍ୟ ଡାକ୍ତରଖାନାରେ ଭର୍ତ୍ତି କରାଯାଇଥିଲେ ବି ସେଠାରେ ଡାକ୍ତର ତାକୁ ମୃତ ଘୋଷଣା କରିଥିଲେ ।
ଆକାଶର ପରିବାର ଅତ୍ୟନ୍ତ ଗରିବ ଶ୍ରେଣୀର ହୋଇଥିବାରୁ ସରକାରୀ ସହାୟତା ଯୋଗାଇଦେବାକୁ ତାଙ୍କ ସମ୍ପର୍କୀୟ ମାନେ ଦାବି କରିଛନ୍ତି ।
ବୌଦ୍ଧରୁ ସତ୍ୟନାରାୟଣ ପାଣି, ଇଟିଭି ଭାରତ
