ବୌଦ୍ଧ: ରଖେ ହରି ତ ମାରେ କିଏ । ଏମିତି ଏକ ମର୍ମନ୍ତୁଦ ସଡକ ଦୁର୍ଘଟଣାରେ ପିତାର ମୃତ୍ୟୁ ହୋଇଥିବା ବେଳେ କୁନି ଝିଅଟି ସୌଭାଗ୍ୟ କ୍ରମେ ବଞ୍ଚି ଯାଇଛି । ଅନ୍ୟ ଜଣେ ଯୁବକ ଗୁରୁତର ଆହତ ହୋଇ ବୁର୍ଲା ସ୍ଥାନାନ୍ତର ହୋଇଛନ୍ତି ।
ବୌଦ୍ଧର ମଥୁରା ପଞ୍ଚାୟତ ଅନ୍ତର୍ଗତ ଖଜୁରୀପଡା ଗାଁ ନିକଟରେ ଶନିବାର ସନ୍ଧ୍ୟାରେ ଏକ ମର୍ମନ୍ତୁଦ ସଡକ ଦୁର୍ଘଟଣା ଘଟିଥିଲା । ସୂଚନା ମୁତାବକ ବୌଦ୍ଧ ନିକଟସ୍ଥ କିଆକଟା ଠାରୁ ଏକ ଥଣ୍ଡା ପାନୀୟ ବୋଝେଇ ମିନି ଟ୍ରକ ଚାରିଛକ ଅଭିମୁଖେ ଯାଉଥିଲା । ଅପରାହ୍ନ ପ୍ରାୟ ୫ଟା ବେଳେ ମଥୁରା ପଞ୍ଚାୟତ ଅନ୍ତର୍ଗତ ଖଜୁରୀପଡା ଗାଁ ନିକଟରେ ଉକ୍ତ ମିନିଟ୍ରକଟି ଭାରସାମ୍ୟ ହରାଇ ରାସ୍ତା କଡକୁ ଓଲଟି ପଡିଥିଲା ।
ଏହି ଟ୍ରକଟି ସେହି କଡରେ ବସିଥିବା ପ୍ରାୟ ଦୁଇ ବର୍ଷର କୁନି ଝିଅକୁ ଧରି ବସିଥିବା ଖଜୁରୀପଡା ଗାଁର ଜିତେନ ନାଏକଙ୍କ ଉପରେ ମାଡି ଯାଇଥିଲା ଠିକ୍ ସେହି ସମୟରେ କୁନି ଝିଅଟି ପ୍ରାୟ ଦଶ ଫୁଟ ଦୂରକୁ ଫିଙ୍ଗି ହୋଇଯାଇଥିଲା । ଦୁର୍ଘଟଣାରେ ପିତାଙ୍କ ମୃତ୍ୟୁ ହୋଇଥିବା ବେଳେ କୁନି ଝିଅଟି ସୌଭାଗ୍ୟ କ୍ରମେ ବଞ୍ଚିଯାଇଛି । ଏହି ଦୁର୍ଘଟଣାରେ ଗାଁର ଅନ୍ୟ ଜଣେ ଯୁବକ ସୂର୍ଯ୍ୟଦ ନାୟକ ଗୁରୁତର ଅବସ୍ଥାରେ ଉଦ୍ଧାର ହୋଇ ଆମ୍ବୁଲାନ୍ସ ନମିଳିବାରୁ ଏକ ଭଡା ଗାଡି କରି ବୌଦ୍ଧ ଡାକ୍ତରଖାନାରେ ଭର୍ତ୍ତି ହୋଇଥିଲେ । ସେଠାରେ ତାଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ ବୁର୍ଲା ସ୍ଥାନାନ୍ତର କରାଯାଇଛି । ଅଶୁଭ ଶନିବାରର ଏହି ଦୁଃଖଦ ଦୁର୍ଘଟଣା ଅଞ୍ଚଳରେ ଶୋକର ଛାୟା ଖେଳିଯାଇଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
