ବୌଦ୍ଧ: ଲଘୁ ଖଣିଜ ସମ୍ପଦରେ ଭରପୁର ବୌଦ୍ଧ ଜିଲ୍ଲାରୁ ଚାଲିଛି ଖୁଲମଖୁଲା ଲୁଟ । ଦିନରାତି ଏକ କରି ମାଫିଆମାନେ ଜଙ୍ଗଲରୁ ବ୍ୟାପକ ଗଛ କାଟିବା ସହ ବେଆଇନ ପଥର ମେଟାଲ ଓ ବିଭିନ୍ନ ନଦୀରୁ ବାଲି ଚୋରା ଚାଲାଣ କରୁଥିବା ଅଭିଯୋଗ ହୋଇଛି । ଯାହାଫଳରେ ସରକାରଙ୍କ କୋଟିକୋଟି ଟଙ୍କାର ରାଜସ୍ବ କ୍ଷତି ହେଉଥିବା ଅଭିଯୋଗ ହୋଇଛି ।
ବିଭିନ୍ନ ନଦୀ ନାଳରୁ ବାଲି ଚୋରା ଚାଲାଣ ସହ ବିଭିନ୍ନ ଜଙ୍ଗଲରେ ବ୍ୟାପକ ଗଛ କାଟି ପଥର, ମୋରମ, ମେଟାଲ ଭଳି ସମ୍ପଦ ହରିଲୁଟ ହେଉଛି । ବୌଦ୍ଧ ଜିଲ୍ଲାର ହରଭଙ୍ଗା, ବୌଦ୍ଧ ଓ କଣ୍ଟାମାଳ ତହସିଲ ଅଧିନରେ ରହିଛି ଅନେକ ପଥର ଖାଦାନ ଓ ବାଲିଘାଟ ।
ରାଜସ୍ବ ବିଭାଗ ଆଖିରେ ଧୂଳି ଦେଇ ପ୍ରତ୍ୟେକ ଦିନ ବାଲି ମାଫିଆମାନେ ଲୁଟ କରି ଚାଲିଛନ୍ତି ସରକାରୀ ଖଣିଜ ସମ୍ପଦ । ସେପଟେ ବୌଦ୍ଧ ବନଖଣ୍ଡ ଅଧିନରେ ଥିବା ମନମୁଣ୍ଡା ଓ କଣ୍ଟାମାଳ ବନାଞ୍ଚଳରେ ବ୍ୟାପକ ଗଛକାଟି ମାଫିଆମାନେ ପଥର, ମୋରମ ଓ ମେଟାଲ ଭଳି ସାମଗ୍ରୀ ପ୍ରତ୍ୟେକ ଦିନ ବୋହି ଚାଲିଛନ୍ତି ।
ତେବେ କିଛି ଅସାଧୁ ବନ କର୍ମଚାରୀଙ୍କ ମିଳିତ ଉଦ୍ୟମରେ ଏସବୁ ବେଆଇନ କାର୍ଯ୍ୟ ଚାଲୁଥିବା ଅଭିଯୋଗ ହୋଇଛି । ସେହିପରି ବର୍ତ୍ତମାନ ପୁରୁଣା କଟକ ରେଞ୍ଜ ଅଧିନରେ ଟ୍ରେଞ୍ଜ ଖୋଳା କାର୍ଯ୍ୟରେ ଅସହାୟ ବୃଦ୍ଧ ଓ ଦିବ୍ୟାଙ୍ଗଙ୍କୁ ଶ୍ରମିକ ଦର୍ଶାଇ ଆର୍ଥିକ ଅନିୟମିତତା କରାଯାଉଥିବା ଅଭିଯୋଗ ହୋଇଛି । ତୁରନ୍ତ ଏଦିଗରେ ଜିଲ୍ଲା ପ୍ରଶାସନ ଦୃଷ୍ଟି ଦେଇ ଦୃଢ ପଦକ୍ଷେପ ଗ୍ରହଣ କରିବାକୁ ବୁଦ୍ଧିଜୀବୀ ଦାବି କରିଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
