ବୌଦ୍ଧ: ଲକଡାଉନ ଆଉ ଦୁଇ ସପ୍ତାହ ବୃଦ୍ଧି ହୋଇଥିବା ବେଳେ ରାଜ୍ୟ ବାହାରର ଦାଦନ ଶ୍ରମିକଙ୍କ ଘରବାହୁଡା ଆରମ୍ଭ ହୋଇଛି । ରବିବାର ସକାଳୁ ଏକ ବସ ଯୋଗେ କୋଡିଏ ଜଣ ଶ୍ରମିକ ଜହ୍ନାପଙ୍କ ଠାରେ ପହଞ୍ଚି ଥିଲେ । ତିନୋଟି ପଞ୍ଚାୟତର ଏହି ଶ୍ରମିକ ମାନେ ସ୍ବାସ୍ଥ୍ୟ ବିଭାଗର ଗାଡି ନଥିବାରୁ ବାଧ୍ୟ ହୋଇ ଚାଲି ସଙ୍ଗରୋଧ ଗୃହକୁ ଯାଇଥିଲେ । ସେହିପରି ବୌଦ୍ଧ ଜିଲ୍ଲା ମଧ୍ୟକୁ ବାହାର ଜିଲ୍ଲାର ଶ୍ରମିକ ମାନେ ଚାଲି ଚାଲି ଆସୁଥିବାବେଳେ ସେମାନଙ୍କୁ ମଧ୍ୟ ଆମ୍ବୁଲାନ୍ସରେ ନିଆଯାଉନଥିବା ଦେଖିବାକୁ ମିଳିଛି । ଯାହାକୁ ନେଇ ବୁଦ୍ଧିଜୀବୀଙ୍କ ମଧ୍ୟରେ ଗଭୀର ଉଦବେଗ ପ୍ରକାଶ କରିଛନ୍ତି ।
ସେପଟେ ସ୍ବାସ୍ଥ୍ୟ ବିଭାଗ ସଂକ୍ରମଣକୁ ପ୍ରତିହତ ପାଇଁ ସବୁ ପ୍ରକାର ବ୍ୟବସ୍ଥା କରାଯାଇଛି ବୋଲି ସିଡିଏମଓ ସୂଚନା ଦେଇଛନ୍ତି । ରବିବାର ସୁଦ୍ଧା ଜିଲ୍ଲାର ସମୁଦାୟ 252 ଜଣଙ୍କ ସ୍ବାବ ଟେଷ୍ଟ ପଠାଯାଇଥିବା ବେଳେ ସେଥିରୁ 179 ଜଣଙ୍କ ନେଗେଟିଭ ରିପୋର୍ଟ ମିଳିସାରିଛି । ତେବେ କୋରୋନାକୁ ନେଇ ଭୟର କୌଣସି କାରଣ ନାହିଁ ବୋଲି ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ କହିଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
