ବୌଦ୍ଧ: ସରକାରୀ ସହାୟତା ଅପେକ୍ଷାରେ ମାନସିକ ଦିବ୍ୟାଙ୍ଗ ମହିଳା । ଦୀର୍ଘ ପାଞ୍ଚ ବର୍ଷ ହେଲା ଦୌଡି ଦୌଡି ନୟାନ୍ତ ହୋଇସାରିଲେଣି, ହେଲେ ମିଳିପାରୁନି ସରକାରୀ ସହାୟତା। ପଞ୍ଚାୟତ କାର୍ଯ୍ୟାଳୟରୁ ବ୍ଲକ ଅଫିସ, ଡାକ୍ତରଖାନାରୁ ଜିଲ୍ଲାପାଳଙ୍କ କାର୍ଯ୍ୟାଳୟ,ସବୁଠି କେବଳ ପ୍ରତିଶୃତି ହେଲେ ଆଜି ପର୍ଯ୍ୟନ୍ତ ପୂରଣ ହୋଇପାରୁନାହିଁ କାମ।
ଏ ଘଟଣା ହେଉଛି ବୌଦ୍ଧ ଜିଲ୍ଲା କଣ୍ଟାମାଳ ବ୍ଲକର ଲମ୍ବସରୀ ପଞ୍ଚାୟତ ଅନ୍ତର୍ଗତ ସାନଝାରମୁଣ୍ଡା ଗ୍ରାମର ଶୋଭାଗିନୀ(ଛଦ୍ମ ନାମ)ଙ୍କ ଦୁଃଖ କାହାଣୀ । ଶୋଭାଙ୍କ ସ୍ବାମୀ କାର୍ତ୍ତିକ ବାବା ଜଣେ ମହିମା ଧର୍ମାବଲମ୍ବୀ ହୋଇଥିବାରୁ ଅଧିକାଂଶ ସମୟ ଘରୁ ବାହାରେ ରହନ୍ତି ।
ପତ୍ନୀ ଶୋଭା ଦୀର୍ଘ ପ୍ରାୟ 5 ବର୍ଷ ତଳେ ଏକ ମାନସିକ ରୋଗରେ ପୀଡିତ ହୋଇଥିଲେ। ଘରେ ଯାହା କିଛି ଅର୍ଥ ରହିଥିଲା, ତାହା ଶୋଭାଙ୍କ ଚିକିତ୍ସାରେ ଶେଷ ହୋଇଗଲା । କିନ୍ତୁ ଶୋଭାଙ୍କ ମାନସିକ ରୋଗ ଭଲ ହେଲାନାହିଁ। ସେହି ଦିନ ଠାରୁ ପତ୍ନୀଙ୍କୁ ସାଙ୍ଗରେ ନେଇ କାର୍ତ୍ତିକ ପଞ୍ଚାୟତ ଠାରୁ ଆରମ୍ଭ କରି ବ୍ଲକ ପର୍ଯ୍ୟନ୍ତ ଓ ଡାକ୍ତରଖାନା ଠାରୁ ଆରମ୍ଭ କରି ଜିଲ୍ଲାପାଳଙ୍କ କାର୍ଯ୍ୟାଳୟ ପର୍ଯ୍ୟନ୍ତ ଦୌଡୁଛନ୍ତି। ଆଶା ତାଙ୍କର କେବଳ ଏକ ଭିନ୍ନକ୍ଷମ ସାର୍ଟିଫିକେଟ ଓ ସରକାରୀ ଭତ୍ତା ଟିକକ ପାଇଁ। ହେଲେ ସମସ୍ତଙ୍କୁ ଗୁହାରି କରି ଅସହାୟ ହୋଇପଡିଛନ୍ତି ଏହି ଦମ୍ପତ୍ତି ।
ଏ ସମ୍ପର୍କରେ ଇଟିଭି ଭାରତ ଠାରୁ ସୂଚନା ପାଇବା ପରେ ବୌଦ୍ଧ ମୁଖ୍ୟ ଚିକିତ୍ସା ଅଧିକାରୀ ଶୋଭାଙ୍କ ସାର୍ଟିଫିକେଟ ପ୍ରଦାନରେ ସବୁପ୍ରକାର ସହଯୋଗ କରାଯିବ ବୋଲି କହିଛନ୍ତି। ସେପଟେ ସାର୍ଟିଫିକେଟ ମିଳିବା ପରେ ଆବଶ୍ୟକ ସରକାରୀ ସହାୟତା ମିଳିପାରିବ ବୋଲି ସାମାଜିକ ସୁରକ୍ଷା ବିଭାଗ ସୂଚନା ଦେଇଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
