ବୌଦ୍ଧ: ସକାଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଲକଡାଉନ ସମୟ ସୀମା ବଢିବା ନେଇ ଘୋଷଣା କରିଥିବା ବେଳେ ବୌଦ୍ଧ ଜିଲ୍ଲାରେ ଲକଡାଉନ ନିୟମରେ ବ୍ୟତିକ୍ରମ ଦେଖିବାକୁ ମିଳିଛି । ରାସ୍ତାରେ ଗାଡି ମୋଟର ଯାତାୟତ ସ୍ବାଭାବିକ ହୋଇଥିବା ସହ କଣ୍ଟ୍ରୋଲ ଦୋକାନ ବାହାରେ ଭିଡ ଜମିଥିବା ନଜର ଆସିଥିଲା । ଜିଲ୍ଲାରେ ଏପରି ଭିଡ ଦେଖି ନିୟନ୍ତ୍ରଣ କରିବା ପାଇଁ ଶେଷରେ ସହକାରୀ ଜିଲ୍ଲାପାଳଙ୍କୁ ହସ୍ତକ୍ଷେପ କରିବାକୁ ପଡିଥିଲା ।
ମଙ୍ଗଳବାର ବୌଦ୍ଧରେ ଏପରି ଦୃଶ୍ୟ ଦେଖିବାକୁ ମିଳିଥିଲା ଯେମିତି ଲକଡାଉନ ଶେଷ ହୋଇଛି । କେବଳ କିଛି ଦୋକାନ ଓ ଅଫିସ ବନ୍ଦ ଥିବା ବେଳେ ପରିସ୍ଥିତି ଏପରି ଥିଲା ଯେ କଣ୍ଟ୍ରୋଲ ଦୋକାନରେ ସାମାନ୍ୟ ଦିନ ଠାରୁ ମଧ୍ୟ ଅଧିକ ଲୋକଙ୍କ ଭିଡ ପରିଲକ୍ଷିତ ହୋଇଥିଲା । ବାରମ୍ବାର ସାମାଜିକ ଦୂରତାକୁ ନେଇ ଜିଲ୍ଲା ପ୍ରଶାସନ, ପୋଲିସ, ସ୍ବେଚ୍ଛାସେବୀ ଅନୁରୋଧ ତଥା ତାଗିଦ କରୁଥିଲେ ମଧ୍ୟ ଲୋକ ସତେ ଯେମିତି ଏହି ନିୟମକୁ ମାନିବାକୁ ନାରାଜ ।
ବୌଦ୍ଧର ପୋଡାଠାରେ ଥିବା ଏକ ପିଡିଏସ ଦୋକାନରେ ଏଭଳି ଭିଡ ଜମିଥିଲା ଯେ ଶେଷରେ ସହକାରୀ ଜିଲ୍ଲାପାଳ ଅବିନାଶ ପାଣ୍ଡିଆ ପହଞ୍ଚି ହସ୍ତକ୍ଷେପ କରିବାକୁ ବାଧ୍ୟ ହୋଇଥିଲେ । ସେପଟେ ସ୍ବେଚ୍ଛାସେବୀ ଲୋକଙ୍କୁ ସଚେତନ ରହିବା ସହ ସାମାଜିକ ଦୂରତା ନରଖିଲେ ପରିସ୍ଥିତି ଅଣାୟତ୍ତ ହେବ ବୋଲି ବୁଝାଇଥିବା ଦେଖାଯାଇଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
