ବୌଦ୍ଧ: ଜିଲ୍ଲାର ବିଭିନ୍ନ ସ୍ଥାନରେ ଥିବା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଲାଗି ରହିଛି ବିଭିନ୍ନ ସମସ୍ୟା । ଏଭଳି ସ୍ଥିତିରେ ସ୍ବାସ୍ଥ୍ୟକେନ୍ଦ୍ରର ମୁଖ୍ୟ ଫାଟକରେ ପଡିଛି ତାଲା । ଯାହାକୁ ନେଇ ଏବେ ସାଧାରଣରେ ପ୍ରକାଶ ପାଇଛି ତୀବ୍ର ଅସନ୍ତୋଷ ।
କଥାରେ ଅଛି ଥାନା, ଡାକ୍ତରଖାନା ଓ ପାଇଖାନା କେବେ ବନ୍ଦ ହୁଏ ନାହିଁ । କିନ୍ତୁ ଜିଲ୍ଲାର ପୁରୁଣା କଟକ, ଚାରିଛକ, ମୁଣ୍ଡାପଡା ଓ ଆମ୍ବଝରୀ ଭଳି କେତେକ ଗୁରୁତ୍ବପୂର୍ଣ୍ଣ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ମୁଖ୍ୟ ଫାଟକରେ ତାଲା ପଡୁଥିବା ଘଟଣା ଏବେ ଜିଲ୍ଲାରେ ଚର୍ଚ୍ଚାର ବିଷୟ ପାଲଟିଛି ।
ସୂଚନା ଅନୁଯାୟୀ, ନିକଟସ୍ଥ ଅଞ୍ଚଳର ରୋଗୀଙ୍କ ସୁବିଧା ପାଇଁ ଖୋଲାଯାଇଥିବା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଅଧିକାଂଶ ସମୟରେ ତାଲା ପଡି ରହୁଛି । ଫଳରେ ଲୋକେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ଅନ୍ୟପକ୍ଷରେ ଏସମ୍ପର୍କରେ ବୌଦ୍ଧ ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀଙ୍କୁ ଯୋଗାଯୋଗ କରିବାରୁ ସେ କୌଣସି ପ୍ରତିକ୍ରିୟା ଦେବାକୁ ନାରାଜ ହୋଇଥିଲେ ।
ଓଲଟା ସାଧାରଣ ଲୋକଙ୍କ ଆକ୍ରୋଶର ଜବାବ ଦେବାକୁ ଯାଇ ସେ କହିଥିଲେ, 'ସ୍ବାସ୍ଥ୍ୟକେନ୍ଦ୍ର ପରିସରରେ ନୂଆ ଗଛ ଲଗା ଚାଲିଛି, ସେଥିପାଇଁ ହୁଏତ ମୁଖ୍ୟ ଫାଟକରେ ତାଲା ପଡିଥାଇପାରେ ।'
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
