ବୌଦ୍ଧ: ଜିଲ୍ଲାରେ ଏକ ପରିଚିତ ଖାଦ୍ୟ ହେଉଛି ଲେଥା। ଧନୀ ହୁଅନ୍ତୁ ଅବା ଗରିବ ସମସ୍ତଙ୍କ ଊଣା ଅଧିକ ଲେଥାର ବ୍ୟବହାର ହୋଇଥାଏ । ତେବେ ଲେଥାର ମୌଳିକତାକୁ ବଜାୟ ରଖି ଏହାକୁ ଅଧିକ ଲୋକପ୍ରିୟ ତଥା ପ୍ରଚାର ପ୍ରସାର ପାଇଁ ଉଦ୍ୟମ ଆରମ୍ଭ କରିଛନ୍ତି ବୌଦ୍ଧ ଜିଲ୍ଲାପାଳ ।
ପଶ୍ଚିମ ଓଡିଶା ତଥା ବିଶେଷ ଭାବରେ ବୌଦ୍ଧ ଅଞ୍ଚଳରେ ଲେଥାର ବହୁଳ ବ୍ୟବହାର କରାଯାଇଥାଏ । ତେବେ ଧିରେ ଧିରେ ଫାଷ୍ଟଫୁଡ ଯୁଗରେ ଏହି ଲେଥା ପଛରେ ପଡିଯିବା ଆଶଙ୍କା ଯୋଗୁଁ ଜିଲ୍ଲାପାଳ ଲଲାଟେନ୍ଦୁ ମିଶ୍ର ଏହାକୁ ଜିଲ୍ଲାର ଏକ ବ୍ରାଣ୍ଡ ଭାବରେ ସାରା ରାଜ୍ୟରେ ପରିଚିତ କରିବାକୁ ପ୍ରୟାସ ଆରମ୍ଭ କରିଛନ୍ତି ।
ପ୍ରଥମ ପର୍ଯ୍ୟାୟରେ ଜିଲ୍ଲାର ବୌଦ୍ଧ DRDA ନିକଟରେ ଏକ ଲେଥା କେନ୍ଦ୍ର ଖୋଲା ଯାଇଥିବା ବେଳେ ପରବର୍ତ୍ତୀ ସମୟରେ କଣ୍ଟାମାଳ ଓ ହରଭଙ୍ଗା ବ୍ଲକରେ ମଧ୍ୟ ଏଭଳି ଲେଥା କେନ୍ଦ୍ର ଖୋଲାଯିବ ବୋଲି ସୂଚନା ମିଳିଛି । ରବିବାର ଖୋଲାଯାଇଥିବା ଲେଥା କେନ୍ଦ୍ରରେ ଖୋଦ ବୌଦ୍ଧ ଜିଲ୍ଲାପାଳ, ଉପଜିଲ୍ଲାପାଳ, ପିଡି, ବିଡ଼ିଓ ପ୍ରମୁଖ ପ୍ରସ୍ତୁତ ଲେଥା ଖାଇଥିଲେ । ଏହାସହ ବୌଦ୍ଧ ଜିଲ୍ଲାର ବିଭିନ୍ନ ପାରମ୍ପରିକ ଖାଦ୍ୟକୁ ଏହି ଲେଥା କେନ୍ଦ୍ର ମାଧ୍ୟମରେ ଲୋକଙ୍କୁ ଯୋଗାଇ ଦିଆଯିବ ବୋଲି ସୂଚନା ମିଳିଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
