ବୌଦ୍ଧ: ସରକାରୀ ବାବୁଙ୍କ ଟାଳଟୁଳା ନୀତି । ଶ୍ରମିକଙ୍କ ବକେୟା ପାଉଣା ନ ଦେଇ ହିନସ୍ତା ହେଲେ ଜଳସେଚନ ବିଭାଗର ସରକାରୀ ବାବୁ । ଉତ୍ୟକ୍ତ ଶ୍ରମିକଙ୍କ ହାବୁଡରେ ପଡି ବାବୁ ଜଣକ ହଟାହଟା ହେବା ଏବେ ବୌଦ୍ଧ ଜିଲ୍ଲାରେ ଚର୍ଚ୍ଚାର ବିଷୟ ପାଲଟିଛି । ଶ୍ରମ କାର୍ଯ୍ୟାଳୟ ଆଗରେ ଶ୍ରମିକଙ୍କ ଧାରଣା ପରେ ଶେଷରେ ସେ ପ୍ରାପ୍ୟ ପ୍ରଦାନ କରି ଶ୍ରମ କାର୍ଯ୍ୟାଳୟରୁ ମୁକ୍ତି ପାଇଛନ୍ତି ।
ଜଳସେଚନ ବିଭାଗର ଅପାରଗତା ଏବେ ଦାଣ୍ଡରେ ପଡି ହାଟରେ ଗଡିଲାଣି । ଏପରିକି ଗରିବ ଶ୍ରମିକଙ୍କ ପାଉଣା ମଧ୍ୟ କୌଶଳରେ ହଡପ କରାଯାଉଥିବା ଦେଖିବାକୁ ମିଳୁଛି ।
ସୂଚନା ଅନୁଯାୟୀ, ବୌଦ୍ଧ ଜିଲ୍ଲା ବୀରନରସିଂହପୁର ଅଞ୍ଚଳର ଗରିବ ଶ୍ରମିକ କେନାଲ କାମ କରି ପ୍ରାପ୍ୟ ପାଇଁ ବାରମ୍ବାର ଜଳସେଚନ କାର୍ଯ୍ୟାଳୟକୁ ଦୌଡି ଥିଲେ ମଧ୍ୟ କୌଣସି ଅଧିକାରୀ ତାଙ୍କ ଗୁହାରୀ ଶୁଣି ନ ଥିଲେ । ଶେଷରେ ଶ୍ରମିକମାନେ ଏନେଇ ବୌଦ୍ଧ ଶ୍ରମ ଅଧିକାରୀଙ୍କୁ ଲିଖିତ ଅଭିଯୋଗ କରିଥିଲେ । ଜଳସେଚନ ବିଭାଗର ଜୈନିକ ଅଧିକାରୀ ଏହି ଉତ୍ୟକ୍ତ ଶ୍ରମିକଙ୍କୁ ବୁଝାଇବାକୁ ଶ୍ରମ କାର୍ଯ୍ୟାଳୟକୁ ଆସି ପୁଣି ସମୟ ଗଡାଇବାକୁ ଚେଷ୍ଟା କରିଥିଲେ । ହେଲେ ଏଥର ଉତ୍ୟକ୍ତ ଶ୍ରମିକ ନଛୋଡ ବନ୍ଧା ହୋଇ ସରକାରୀ ବାବୁ ଜଣଙ୍କୁ ଘେରି ନାନା ଗାଳିମନ୍ଦ ଦେଇ ଶ୍ରମ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିଥିଲେ । ଶେଷରେ ପାଣି ମୁଣ୍ଡ ଉପରେ ବୋହିବା ଦେଖି ଜଳସେଚନ ବିଭାଗର ବାବୁ ଜଣକ ଶ୍ରମିକଙ୍କ ପ୍ରାପ୍ୟ ପ୍ରଦାନର ବ୍ୟବସ୍ଥା କରିଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
