ବୌଦ୍ଧ: ଲକଡାଉନ ସମୟରେ ଉନ୍ନୟନ କାର୍ଯ୍ୟରେ ଶ୍ରମିକ ନିୟୋଜନ ଅଭିଯୋଗ ହୋଇଛି । ଅଭିଯୋଗ ମିଳିବା ପରେ ଶ୍ରମ ଅଧିକାରୀ ସମ୍ପୃକ୍ତ ସ୍ଥାନକୁ ଯାଇ ନିର୍ମାଣ କାର୍ଯ୍ୟ ସମ୍ପୂର୍ଣ୍ଣ ବନ୍ଦ ପାଇଁ ନିର୍ଦ୍ଦେଶ ଦେବା ସହ ସ୍ବଚ୍ଛତା ଓ ସାମାଜିକ ଦୂରତା ବଜାୟ ରଖିବାକୁ ପରାମର୍ଶ ଦେଇଛନ୍ତି । ଘଟଣାଟି ହେଉଛି ବୌଦ୍ଧ ଜିଲ୍ଲା ହରଭଙ୍ଗା, ବୌଦ୍ଧ ଓ କଣ୍ଟାମାଳ ବ୍ଲକର ବିଭିନ୍ନ ସ୍ଥାନର । ଯେଉଁଠି ପହଞ୍ଚି ଉନ୍ନୟନ କାର୍ଯ୍ୟରେ ଶ୍ରମିକଙ୍କୁ ନିୟୋଜନ କରାଯାଉଥିବା ସ୍ଥାନ ଗୁଡିକକୁ ଶ୍ରମ ଅଧିକାରୀ ତଦନ୍ତ କରିଛନ୍ତି ।
ସମ୍ପୃକ୍ତ ସ୍ଥାନ ଗୁଡିକରେ ଲକଡାଉନ ସତ୍ତ୍ବେ ନିର୍ମାଣ କାର୍ଯ୍ୟ ଚାଲିଥିବାରୁ ଏହାକୁ ସମ୍ପୂର୍ଣ୍ଣ ବନ୍ଦ ରଖିବାକୁ ନିର୍ଦ୍ଦେଶ ଦେବା ସହ ସ୍ବଚ୍ଛତା ଓ ସାମାଜିକ ଦୂରତା ଉପରେ ବିଶେଷ ଗୁରୁତ୍ବ ଦେବାକୁ ପରାମର୍ଶ ଦିଆଯାଇଛି । ଶନିବାର କଣ୍ଟାମାଳ ବ୍ଲକର ମେଗା ପାନୀୟ ଜଳ ଯୋଗାଣ ପ୍ରକଳ୍ପ ସ୍ଥାନକୁ ପରିଦର୍ଶନ କରି ଶ୍ରମିକମାନଙ୍କ ସହ ଆଲୋଚନା କରିଥିଲେ ଶ୍ରମ ଅଧିକାରୀ ।
ସେପଟେ ଶନିବାର ବୌଦ୍ଧ ଥାନା ଅଧିନରେ 4 ଜଣ ରାଜ୍ୟ ବାହାରର ଶ୍ରମିକଙ୍କୁ ସନ୍ଦିଗ୍ଧ ଅବସ୍ଥାରେ ଉଦ୍ଧାର କରାଯାଇ କ୍ବାରେଣ୍ଟାଇନ ହୋମରେ ରଖାଯାଇଥିବା ସୂଚନା ମିଳିଛି । ତେବେ ଅଦ୍ୟାବଧି ବୌଦ୍ଧ ଜିଲ୍ଲା ପାଇଁ ସେଭଳି କୌଣସି ଅସୁବିଧା ନାହିଁ ବୋଲି ସିଡିଏମଓ ଲକ୍ଷ୍ମୀଧର ସାହୁ କହିଛନ୍ତି । ତଥାପି ସତର୍କତା ନିହାତି ଜରୁରୀ ବୋଲି ମଧ୍ୟ ସେ କହିଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
