ବୌଦ୍ଧ: ନିଃସଙ୍ଗ ଜୀବନ ବିତାଉଛନ୍ତି ଲୋମଶ କନ୍ୟା ରେବତୀ । ଦିନେ ଜାତୀୟ ଗଣମାଧ୍ୟମରେ ଶିରୋନାମା ପାଲଟିଥିବା ଲୋମଶ କନ୍ୟା ବର୍ତ୍ତମାନ ଅତ୍ୟନ୍ତ ଦୟନୀୟ ଅବସ୍ଥାରେ କାଳ କାଟୁଛନ୍ତି । ସରକାରଙ୍କ ମାଳ ମାଳ ଯୋଜନା ଥିବା ସତ୍ତ୍ବେ ଲୋମଶ କନ୍ୟାଙ୍କ ପାଇଁ ତାହା ଦିବା ସ୍ବପ୍ନ ହୋଇ ରହିଛି । କେବଳ 5କେଜି ଚାଉଳ ଓ ପାଞ୍ଚ ଶହ ଟଙ୍କାରେ ବିତୁଛି ଏହି ବଣ ବାଳିକାଙ୍କ ଜୀବନ । ବୌଦ୍ଧ ଜିଲ୍ଲାର ସୀମାନ୍ତ ତଳଗାଁ ପଞ୍ଚାୟତର ବଣ ଜଙ୍ଗଲ ଘେରା ଗ୍ରାମ ଖଳିସାହି । ଏହି ଖଳିସାହିରେ ବସବାସ କରୁଥିବା ବାଳକୃଷ୍ଣ କହଁରଙ୍କ ପରିବାରରେ ପ୍ରାୟ ପଚିଶ ବର୍ଷ ପୂର୍ବରୁ ଜନ୍ମ ନେଇଥିଲା ଏକ ବାଳିକା । ବାଳିକାର ଶରୀରରେ ପିତା ବାଳକୃଷ୍ଣ ଓ ଜେଜେବାପା ଙ୍କ ଭଳି ଲୋମରେ ଭରି ରହିଥିଲା । ବଣ ଜଙ୍ଗଲ ଅଞ୍ଚଳରେ କେତେକ ଏହାକୁ ଭାଲୁଛୁଆ ସହିତ ତୁଳନା କରିବା ସହିତ ଝିଅର ଭୟଙ୍କର ଚେହେରା ଯୋଗୁଁ ପାଖକୁ ଯିବାକୁ ଭୟ ମଧ୍ୟ କରୁଥିଲେ ।
ପରିବର୍ତ୍ତିତ ସମୟରେ ଲୋମଶ କନ୍ୟା ରେବତୀ ଭାବରେ ପରିଚିତ ହୋଇଥିଲା । କିନ୍ତୁ ରେବତୀର ଜଟିଳ ଚିକିତ୍ସା ଗରିବ ବାଳକୃଷ୍ଣଙ୍କ ପାଇଁ ଅପହଞ୍ଚ ହୋଇ ରହିଥିଲା । ସେତେବେଳେ ଜାତୀୟ ଗଣମାଧ୍ୟମରେ ଏହାର ଖବର ପ୍ରସାରଣ ମଧ୍ୟ ହୋଇଥିଲା । ଏନେଇ ପରେ ସରକାର ରେବତୀର ଚିକିତ୍ସା ପାଇଁ ସହାୟତାର ହାତ ବଢାଇଥିଲେ । କିନ୍ତୁ ତାହା ଅଧପନ୍ତରିଆ ହୋଇ ରହିଗଲା । ବର୍ତ୍ତମାନ ରେବତୀର ଶରୀରରେ ଆଉ ଲୋମ ଉଠୁନାହିଁ । କିନ୍ତୁ ରେବତୀର ବୟସ ବୃଦ୍ଧି ସହିତ ତାର ଦୁଃଖ ମଧ୍ୟ ବୃଦ୍ଧି ପାଇବାରେ ଲାଗିଛି । ବର୍ତ୍ତମାନ ସେ ଅତ୍ୟନ୍ତ ଦୟନୀୟ ଅବସ୍ଥାରେ କାଳ କାଟୁଛନ୍ତି ।
