ବୌଦ୍ଧ: ପାରମ୍ପରିକ କଳା ସଂସ୍କୃତି ପାଇଁ ଏକ ସ୍ବତନ୍ତ୍ର ପରିଚୟ ସୃଷ୍ଟି କରିଥିବା ଜିଲ୍ଲା ଆଜି ତାର ସତ୍ତା ହରାଇବାକୁ ବସିଛି। ଚାନ୍ଦୁଆ ଶିଳ୍ପ ପାଇଁ ବୌଦ୍ଧ ଜିଲ୍ଲାର ବୁଟୁପାଲି ଗ୍ରାମ ଦ୍ବିତୀୟ ପିପିଲି ଭାବେ ପରିଚିତ । ବର୍ତ୍ତମାନ ଆବଶ୍ୟକ ଭିତ୍ତିଭୂମି ଅଭାବରୁ ସରକାରୀ ସହାୟତା ଅପେକ୍ଷାରେ ରହିଛନ୍ତି ଲୋକେ।
ବୌଦ୍ଧ ଜିଲ୍ଲା ସଦର ମହକୁମା ଅନ୍ତର୍ଗତ ବୁଟୁପାଲିର ଚାନ୍ଦୁଆ ଶିଳ୍ପ ଗଡଜାତ ଶାସନ କାଳରୁ ଚାଲି ଆସିଛି । ପିଢ଼ି ପରେ ପିଢ଼ି ଏହି ବ୍ୟବସାୟ ସହିତ ଜଡ଼ିତ ପରିବାର ନିଜ କୌଳିକ ବୃତ୍ତିକୁ ଜାବୁଡି ଧରିଥିଲେ । ବୁଟୁପାଲିର ଏହି କାରିଗର ମାନେ ଚାନ୍ଦୁଆ ସହିତ ଛତ୍ର, ପର୍ଭା,ଘରସାଜ ସଜ୍ଜା ସାମଗ୍ରୀକୁ ପ୍ରସ୍ତୁତ କରିଥାନ୍ତି । ଏସବୁ ସାମଗ୍ରୀର ରାଜ୍ୟ ତଥା ରାଜ୍ୟ ବାହାରେ ଯଥେଷ୍ଟ ଚାହିଦା ରହିଥିଲେ ମଧ୍ୟ ବଜାର ଅଭାବ ସାଙ୍ଗକୁ ସରକାରୀ ପ୍ରୋତ୍ସାହନ ଅଭାବ କାରଣରୁ ଚାନ୍ଦୁଆ ଶିଳ୍ପ ସହିତ ଜଡିତ ପରିବାର ଅତ୍ୟନ୍ତ ଦୁର୍ଦ୍ଦିନରେ ରହିଛନ୍ତି । ଅନ୍ୟପଟେ ସରକାରୀ ପ୍ରୋତ୍ସାହନ ଅଭାବରୁ ଶିଳ୍ପୀ ପରିବାର କୌଳିକ ବୃତ୍ତିରୁ ମୁହଁ ଫେରାଇବା ଆରମ୍ଭ କଲେଣି । ତେଣୁ ସରକାରଙ୍କ ପକ୍ଷରୁ ଚାନ୍ଦୁଆ ଶିଳ୍ପୀଙ୍କୁ ସହାୟତା ଯୋଗାଇ ଦେବାକୁ ଦାବି ହୋଇଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
