ବୌଦ୍ଧ: ପରିଶ୍ରମ କରି ସାଇତି ଥିବା ଘରକରଣାଠାରୁ ଆରମ୍ଭ କରି ସବୁ ଏବେ ପୋଡି ଜଳି ପାଉଁଶ । କଳା ଅଙ୍ଗାର ପାଉଁଶ ଭିତରୁ ନିଜ ସାଇତା ଜିନିଷକୁ ଖୋଜିଲେ ବି କିଛି ମିଳୁନାହିଁ । ବୌଦ୍ଧ ଜିଲ୍ଲା ଖୁଣ୍ଟବନ୍ଧ ଜଗନ୍ନାଥପୁର ଗାଁର ଦୁଇଟି ପରିବାରର ଘରେ ନିଆଁ ଲାଗି ସର୍ବସ୍ବ ଜଳିପୋଡି ପାଉଁଶ ହୋଇଯାଇଛି । ପରିବାରକୁ ସହାୟତା ପ୍ରଦାନ କରିବାକୁ ଦାବି ହୋଇଛି ।
ଗତକାଲି ବିଳମ୍ବିତ ରାତିରେ କୌଣସି କାରଣରୁ ନିଆଁଲାଗି ଯାଇଥିଲା । ଏହି ଅଗ୍ନିକାଣ୍ଡରେ ଜଗନ୍ନାଥପୁର ଗ୍ରାମର ଦୁଇଭାଇଙ୍କ ଘର ସହିତ 12ଟି ଛେଳି ଜୀବନ୍ତ ଦଗ୍ଧ ହୋଇଯାଇଛନ୍ତି । ଅଗ୍ନିକାଣ୍ଡର କାରଣ ଜଣାପଡିନାହିଁ ।
ନିଆଁ ଲାଗିବାର ଖବର ପାଇ ଦମକଳ ବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଥିଲା । ହେଲେ ସେତେବେଳକୁ ସବୁ ପୋଡି ଜଳି ଛାରଖାର ହୋଇଯାଇଥିଲା । ଏବେ ଦୁଇଟି ପରିବାର ପେଟ ପଟଣା ପାଇଁ ଚିନ୍ତାରେ ପଡିଯାଇଛନ୍ତି । ଦୁଇ ଭାଇ ଅତ୍ୟନ୍ତ ଗରିବ ହୋଇଥିବାରୁ ଦୁଇ ପରିବାରକୁ ସରକାରୀ ସହାୟତା ଯୋଗାଇ ଦେବାକୁ ଦାବି ହୋଇଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
