ବୌଦ୍ଧ: ଘରେ ନପସୁଣୁ ମୁଣ୍ଡରେ ଚାଳ ବାଜିଲାଣି । ବୌଦ୍ଧ ଜିଲ୍ଲାରେ ରବିଧାନ କ୍ରୟ ଆରମ୍ଭରୁ ଦେଖାଦେଇଛି ଅବ୍ୟବସ୍ଥା । ସମବାୟ ବିଭାଗର ଅପାରଗତା ଏବେଠାରୁ ବାରି ହୋଇଗଲାଣି । ଜିଲ୍ଲାରେ ରବିଧାନ ସଂଗ୍ରହ ଗତ ପଚିଶ ତାରିଖରୁ ଉମା ସମବାୟ ସମିତିରେ ଶୁଭାରମ୍ଭ ହୋଇଥିଲା ।
ଜିଲ୍ଲାର ସମୁଦାୟ 23 ଗୋଟି ମଣ୍ଡିର 24ଟି କେନ୍ଦ୍ରରେ ରବିଧାନ ସଂଗ୍ରହ ପାଇଁ ଲକ୍ଷ୍ୟ ରଖାଯାଇଥିବା ବେଳେ ଆଜି ବାଉଁଶୁଣୀ ଧାନ ମଣ୍ଡିରେ ଚାଷୀଙ୍କ ପଞ୍ଜିକରଣ ହୋଇନଥିବା କାରଣରୁ ଏକ ଅପ୍ରୀତିକର ପରିସ୍ଥିତି ସୃଷ୍ଟି ହୋଇଥିଲା । ଶେଷରେ ଉତ୍ୟକ୍ତ ଚାଷୀ ମଣ୍ଡି ଆଗରେ ଧାରଣାରେ ବସିବା ସହ ଧାନକ୍ରୟକୁ ବନ୍ଦ କରିଦେଇଥିଲେ ।
ସେପଟେ ଆଜି(ସୋମବାର) ବୌଦ୍ଧ ଧାନ ମଣ୍ଡିରେ ମଧ୍ୟ ଧାନକ୍ରୟ ଆରମ୍ଭ ହୋଇଥିବା ବେଳେ ମର୍ଜାକୁଦକର ପାଞ୍ଚ ଜଣ ଚାଷୀଙ୍କ ରବି ଧାନକୁ ସୁରୁଖୁରୁରେ କିଣାଯାଇଥିବା ସୂଚନା ମିଳିଛି । ଜିଲ୍ଲାର ରବିଧାନ କ୍ରୟକୁ ସମ୍ପର୍କରେ ସହକାରୀ ଯୋଗାଣ ଅଧିକାରୀ ଇଟିଭି ଭାରତକୁ ବିସ୍ତୃତ ସୂଚନା ପ୍ରଦାନ କରିଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ