ବୌଦ୍ଧ: ଆସନ୍ନ ମରୁଡି ଓ ମେଗା ଜଳସେଚନ ପ୍ରକଳ୍ପର ଅନିଶ୍ଚିତତାକୁ ନେଇ ବିଭିନ୍ନ ସଂଗଠନ ପକ୍ଷରୁ ରାସ୍ତାରେ ବସିଲା ଚାଷୀ କୋର୍ଟ । ତେବେ ବୌଦ୍ଧରେ ଅନାବୃଷ୍ଟି ଯୋଗୁଁ ଉତ୍କଟ ମରୁଡି ସମ୍ଭାବନା ସୃଷ୍ଟି ହୋଇଛି । ଜିଲ୍ଲାରେ ଜଳସେଚନ ପାଇଁ ପର୍ଯ୍ୟାପ୍ତ ଭିତ୍ତିଭୂମି ରହିଥିବା ସତ୍ତ୍ବେ ଚାଷୀମାନେ ମରୁଡିର ସମ୍ମୁଖୀନ ହେଉଛନ୍ତି । ଏ ସମ୍ପର୍କରେ ବାରମ୍ବାର ବିଭିନ୍ନ ଚାଷୀ ସଂଗଠନ ଗୁହାରି ତଥା ଦାବି କରିଥିଲେ ମଧ୍ୟ କୌଣସି ସୁଫଳ ନମିଳିବାରୁ ଚାଷୀମାନେ ରାସ୍ତାରେ ଚାଷୀ କୋର୍ଟ ବସାଇଛନ୍ତି।
ଗତକାଲି(ବୁଧବାର) ବୌଦ୍ଧ ଜିଲ୍ଲା ସାମ୍ପୋଚ ପଞ୍ଚାୟତ ଅନ୍ତର୍ଗତ ବଳରାମପୁର ଗ୍ରାମ ରାସ୍ତା ଉପରେ ଅଞ୍ଚଳର ଚାଷୀମାନଙ୍କୁ ନେଇ ଜିଲ୍ଲା ବିଜେପି, ଭାରତୀୟ କିଷାନ ସଂଘ, କୃଷକ ମୋର୍ଚ୍ଚା ଓ ଅନ୍ୟାନ୍ୟ ଚାଷୀ ସଂଗଠନର ନେତାମାନେ ଆଗାମୀ ଆନ୍ଦୋଳନ ପାଇଁ ରଣନୀତି ପ୍ରସ୍ତୁତ କରିଥିଲେ । ବିଶେଷ ଭାବରେ ମହାନଦୀ କୂଳରେ ଥିବା ହରଭଙ୍ଗା ବ୍ଲକର ସାମ୍ପୋଚ ସମେତ ରାମଗଡ ଓ ଧଳପୁରଠାରେ ହେବାକୁ ଥିବା ମେଗା ଜଳସେଚନ ପ୍ରକଳ୍ପ ଅନିଶ୍ଚିତତା ମଧ୍ୟକୁ ଠେଲି ହୋଇଯାଇ ଥିବାରୁ ଗଭୀର ଉଦବେଗ ପ୍ରକାଶ ପାଇଥିଲା ।
ଗୋଟିଏ ପଟରେ ଚାଷୀଙ୍କୁ ଜଳସେଚନ ପାଇଁ ପାଣି ମିଳୁନଥିବା ବେଳେ ତିତିରକଟା ସ୍ପିରିଟ କମ୍ପାନୀକୁ ମହାନଦୀରୁ ପାଣି ଯୋଗାଣକୁ ତୀବ୍ର ନିନ୍ଦା କରିଥିଲେ । ଏପରିକି ଆସନ୍ତା ପଞ୍ଚାୟତ ନିର୍ବାଚନରେ ଅଞ୍ଚଳବାସୀ ଭୋଟ ବର୍ଜନ କରିବେ ବୋଲି ଧମକ ଦେଇଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
