ବୌଦ୍ଧ: କନିଷ୍ଠ ଯନ୍ତ୍ରୀଙ୍କୁ ନିର୍ବାହୀଯନ୍ତ୍ରୀଙ୍କ ଉଦବେଗର ସହିତ ଆକ୍ଷେପ । ଏପରି ଦୃଶ୍ୟ ଦେଖିବାକୁ ମିଳିଛି ବୌଦ୍ଧ ଜିଲ୍ଲା ଜଳ ଓ ପରିମଳ ବିଭାଗର ଜିପି ମନିଟର ମିଟିଂରେ । ମିଟିଂରେ ହିଁ ବିଭାଗର ଗୁମର ଖୋଲିଥିଲେ ଖୋଦ ବିଭାଗୀୟ ମୁଖ୍ୟ ।
ପରିମଳ ବ୍ୟବସ୍ଥାକୁ ପଞ୍ଚାୟତ ସ୍ତରରେ ବ୍ୟବସ୍ଥିତ କରିବାକୁ ଚୟନ କରାଯାଇ ୩ ଜୁନ ୨୦୧୮ ଠାରୁ ପ୍ରତ୍ୟେକ ପଞ୍ଚାୟତରେ ମନିଟର ନିୟୋଜିତ ହୋଇଥିଲେ । କିନ୍ତୁ ଇତିମଧ୍ୟରେ ପ୍ରାୟ ଦେଢବର୍ଷ ବିତିଯାଇଥିଲେ ମଧ୍ୟ ଉକ୍ତ ମନିଟର ମାନଙ୍କୁ ଦରମା କିମ୍ବା କୌଣସି ଇନସେନଟିଭ ତ ଦୂରର କଥା ବର୍ତ୍ତମାନ ଯାଏ ଆପଏଣ୍ଟମେଣ୍ଟ ଲେଟର ଖଣ୍ଡେ ଦିଆଯାଇ ନଥିବା ଜିପି ମନିଟର ସ୍ବାଧିନ ପରିଡା କହିଛନ୍ତି ।
ଏଭଳି ସାଙ୍ଘାତିକ ଅଭିଯୋଗ ବୈଠକରେ ଉଠିବା ପରେ ବିଭାଗୀୟ ଅଧିକାରୀ ଆକ୍ସନ ମୁଡକୁ ଆସିବା ସହ ସେଠାରେ ଉପସ୍ଥିତ କନିଷ୍ଠ ଯନ୍ତ୍ରୀଙ୍କୁ ଜବାବ ତଲବ କରିଥିଲେ । ଯନ୍ତ୍ରୀଙ୍କ ଟାଳଟୁଳ ଜବାବ ଯୋଗୁଁ ତାଙ୍କ ଉପରେ ବର୍ଷିଥିଲେ ନିର୍ବାହୀ ଯନ୍ତ୍ରୀ । କେବଳ ବୌଦ୍ଧ ଜିଲ୍ଲାରେ ତମେ ତିଷ୍ଠିଛ ଅନ୍ୟ କେଉଁଠି ଏଭଳି ହୁଅନ୍ତା ନାହିଁ ବୋଲି ତାଗିଦ କରିଥିଲେ ନିର୍ବାହୀ ଯନ୍ତ୍ରୀ । ଏଥିସହ ଦୁଇ ଦିନ ମଧ୍ୟରେ ଘଟଣାର ସମାଧାନ କରିବାକୁ ନିର୍ଦ୍ଦେଶ ଦେଇଥିବା ବିଭାଗୀୟ ଅଧିକାରୀ ଭଞ୍ଜ କିଶୋର ମନୋହାରୀ ସୂଚନା ଦେଇଛନ୍ତି । ତେବେ ସମ୍ପୃକ୍ତ ବିଭାଗର ଏଭଳି ଅବସ୍ଥା ପାଇଁ ଦାୟୀ କିଏ ଏନେଇ ପ୍ରଶ୍ନ ଉଠିଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଈଟିଭି ଭାରତ
