ବୌଦ୍ଧ: ରାଜ୍ୟରେ ପହଞ୍ଚିଛି ମୌସୁମୀ । ହେଲେ ଏଯାଏଁ ଦୂର ହୋଇ ପାରିନି ରାଜ୍ୟର ବିଭିନ୍ନ ସ୍ଥାନରେ ଉତ୍କଟ ରୂପ ଧାରଣ କରିଥିବା ପାନୀୟଜଳ ସମସ୍ୟା । ବୌଦ୍ଧ ଜିଲ୍ଲାର ଉପାନ୍ତ ପଞ୍ଚାୟତରେ ଶତାଧିକ ଅପହଞ୍ଚ ଗ୍ରାମରେ ଆଜି ଯାଏଁ ଲୋକେ ପାନୀୟଜଳ ପାଇଁ ସଙ୍ଘର୍ଷ କରୁଥିବା କଥାକୁ ପ୍ରଶାସନ ମଧ୍ୟ ସ୍ବୀକାର କରିଛି । ହେଲେ ଚଳିତ ବର୍ଷର ମୌସୁମୀ ଆସି ପହଞ୍ଚିବା ସତ୍ତ୍ବେ ଦୂର ହୋଇ ପାରିଲାନି ଏହି ପାନୀୟଜଳ ସମସ୍ୟା ।
ବୌଦ୍ଧ ଜିଲ୍ଲାର ଆମ୍ବଝରୀ, ଶଗଡା, ଗୁନ୍ଦୁଳିଆ, ତଳଗାଁ, ଆଢେଣୀଗଡ ଭଳି ଉପାନ୍ତ ପଞ୍ଚାୟତର ଶତାଧିକ ଅପହଞ୍ଚ ଗ୍ରାମରେ ପାନୀୟଜଳ ପାଇଁ ଆଜି ବି ସ୍ଥାନୀୟ ଅଧିବାସୀ ସଙ୍ଘର୍ଷ କରୁଛନ୍ତି । ମାଇଲ ମାଇଲ ବାଟ ଚାଲି ପାହାଡୀ ଝରଣାର ଶୁଷ୍କ ଶଯ୍ୟାରୁ ଚୂଆଁ ଖୋଳି ପାଣି ସଂଗ୍ରହ କରୁଛନ୍ତି । ବୌଦ୍ଧ ଜିଲ୍ଲା ଶଗଡା ପଞ୍ଚାୟତର ସିଗାଡି, ମାଳତୀ ଗୋଛାପଡା, ଚୁହୁରାକୋଣ, ବାତେପଙ୍ଗା, ବାଡେପଙ୍ଗା ଭଳି ଗାଁଗୁଡିକ ସାଧାରଣ ଜନଜୀବନଠାରୁ ବର୍ଷ ତମାମ ବିଛିନ୍ନ ହୋଇ ରହୁଥିବା ଯୋଗୁଁ ଏଠାକାର ଅଧିବାସୀ ଅତ୍ୟନ୍ତ ଦୟନୀୟ ଅବସ୍ଥାରେ କାଳ କାଟୁଛନ୍ତି ।
