ବୌଦ୍ଧ: ଶୁଖିଗଲାଣି ମହାନଦୀ । ସେପଟେ ଆଗାମୀ ଦିନରେ ପାନୀୟ ଜଳ କଷ୍ଟ ଆହୁରି ବୃଦ୍ଧି ପାଇବା ଆଶଙ୍କା ସୃଷ୍ଟି ହୋଇଥିବା ବେଳେ ବିଭାଗୀୟ ଉଦାସୀନତା ସମସ୍ତଙ୍କୁ ଆଶ୍ଚର୍ଯ୍ୟ କରିଛି ।
ଖରାଦିନ ଆରମ୍ଭରୁ ପାନୀୟ ଜଳ କଷ୍ଟର ପଦଧ୍ବନୀ ଶୁଣାଗଲାଣି । ମହାନଦୀର ଶଯ୍ୟା ଶୁଷ୍କ ହେବାକୁ ବସିଲାଣି । ମହାନଦୀ ବୌଦ୍ଧ ଜିଲ୍ଲା ଦେଇ ସର୍ବାଧିକ ପ୍ରବାହିତ ହେଉଥିଲେ ମଧ୍ୟ ବର୍ଷ ବର୍ଷ ଧରି ପାନୀୟ ଜଳ ନେଇ ସମସ୍ୟା ଲାଗି ରହୁଛି ।
ଏହାର ପ୍ରତିକାର ପାଇଁ ସରକାର ପ୍ରାୟ 15 କୋଟି ଟଙ୍କା ବ୍ୟୟରେ ମହାନଦୀ କୂଳରେ ଇନଟେକ ଓ୍ବେଲ ନିର୍ମାଣ କରିଥିଲେ । ବୌଦ୍ଧ ସହାରାଞ୍ଚଳକୁ ପାନୀୟଜଳ ସୁବ୍ୟବସ୍ଥିତ କରିବା ଏହାର ଲକ୍ଷ୍ୟ ଥିଲା । କିନ୍ତୁ ବର୍ତ୍ତମାନ ଖରାଦିନ ଆରମ୍ଭରୁ ମହାନଦୀ ଶଯ୍ୟା ଶୁଷ୍କ ହୋଇପଡିଥିବା ବେଳେ ବିଭାଗୀୟ ଉଦାସୀନତା ଯୋଗୁଁ ସହରାଞ୍ଚଳରେ ପାନୀୟ ଜଳ ଯୋଗାଣ ପାଇଁ ପାଇପ ବିଛା କାର୍ଯ୍ୟ ସମ୍ପୂର୍ଣ୍ଣ ହେବାର ନା ଧରୁନି ।
ଫଳରେ ଜନ ଅସନ୍ତୋଷ ପ୍ରକାଶ ପାଇଛି । ଏନେଇ ଜିଲ୍ଲାପାଳ ବୌଦ୍ଧ ସହରକୁ ପାନୀୟ ଜଳ ଯୋଗାଣ ସମ୍ପର୍କରେ ନିଆଯାଉଥିବା ପଦକ୍ଷେପ ସମ୍ପର୍କରେ ସୂଚନା ଦେଇଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
