ବୌଦ୍ଧ: ଜାତୀୟ ରାଜପଥ ଉପରେ ବସୁଛି ଉଠା ଦୋକାନ। ଫଳରେ ଟ୍ରାଫିକ ସମସ୍ୟା ସୃଷ୍ଟି ହେବା ସହ ଦୁର୍ଘଟଣାର ଆଶଙ୍କା ମଧ୍ୟ ସୃଷ୍ଟି ହୋଇଛି । ବୌଦ୍ଧ ଜିଲ୍ଲା ମଧ୍ୟ ଦେଇ 57 ନମ୍ବର ଜାତୀୟ ରାଜପଥ ମନମୁଣ୍ଡା ଠାରୁ ମାଧପୁର ପର୍ଯ୍ୟନ୍ତ ଯାଇଛି । ଏହି ରାଜପଥ କଡରେ ମନମୁଣ୍ଡା, ଦହ୍ୟା, ବାଉଁଶୁଣୀ, ସାହାଜପାଲ, ଜହ୍ନାପଙ୍କ, ବୀରନରସିଂପୁର, ପୁରୁଣାକଟକ ଓ ଚାରିଛକ ଭଳି ବଜାର ସହିତ ବୌଦ୍ଧ ପୌରାଞ୍ଚଳ ଆସିଥାଏ । ତେବେ ଅନେକ ସ୍ଥାନରେ ଠେଲା ବ୍ୟବସାୟ ଓ ଗାଡି ମୋଟର ପାର୍କିଂ ଯୋଗୁଁ ଟ୍ରାଫିକ ବ୍ୟବସ୍ଥାରେ ସମସ୍ୟା ସୃଷ୍ଟି ହେଉଥିବା ଅଭିଯୋଗ ହୋଇଛି।
ବୌଦ୍ଧ ପୌରାଞ୍ଚଳର ଅନେକ ରାସ୍ତା ଉପରେ ବାଲି, ଗୋଡି, ଇଟା, ମାଟି ଆଦି ମାସ ମାସ ଧରି ପଡି ରହୁଥିବାରୁ ଏନେଇ ମଧ୍ୟ ସମସ୍ୟା ସୃଷ୍ଟି ହେଉଛି। ସେପଟେ ସହରର ଅନେକ ସ୍ଥାନରେ ବେଆଇନ ହୋର୍ଡିଂ ଲାଗିଥିବା ଅଭିଯୋଗ ହୋଇଛି। ଗତ କିଛି ଦିନ ପୂର୍ବରୁ ପୌର ପ୍ରଶାସନ ପକ୍ଷରୁ କେତେକ ନିୟମ ଖିଲାପକାରୀଙ୍କ ଠାରୁ ଫାଇନ ଆଦାୟ ହୋଇଥିଲେ ମଧ୍ୟ ପରିସ୍ଥିତି ନିୟନ୍ତ୍ରଣ ହୋଇପାରି ନାହିଁ। ତୁରନ୍ତ ଏଦିଗରେ ପଦକ୍ଷେପ ଗ୍ରହଣ କରିବାକୁ ବୁଦ୍ଧିଜୀବୀ ଦାବି କରିଥିବା ବେଳେ, ପୌର ଅଧିକାରୀ ଏହା ବିରୁଦ୍ଧରେ କାର୍ଯ୍ୟାନୁଷ୍ଠାନ ହେବ ବୋଲି କହିଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
