ବୌଦ୍ଧ: ଡାଏରିଆରେ ଶତାଧିକ ଲୋକ ହେଲେଣି ଆକ୍ରାନ୍ତ । ହେଲେ ଏନେଇ ଜିଲ୍ଲା ସ୍ବାସ୍ଥ୍ୟ ବିଭାଗ କିମ୍ବା ଗ୍ରାମ୍ୟ ଜଳ ଯୋଗାଣ ବିଭାଗ ପାଖରେ କୌଣସି ଖବର ନଥିବାରୁ ମହାମାରୀର ରୂପ ନେବାକୁ ବସିଲାଣି ଏହି ଜଳବାହିତ ରୋଗ ।
ବୌଦ୍ଧ ଜିଲ୍ଲା ବହିରା ପଞ୍ଚାୟତର ତେନ୍ତୁଳିପାଲି ଗାଁରେ ଏବେ ଡାଏରିଆକୁ ନେଇ କୋକୁଆ ଭୟ ସୃଷ୍ଟି ହୋଇଛି । ବିଗତ କିଛି ବର୍ଷ ପୂର୍ବରୁ ଏଠାରେ ଏହିଭଳି ଡାଏରିଆରେ କୋଡିଏରୁ ଉର୍ଦ୍ଧ୍ବ ଲୋକଙ୍କ ମୃତ୍ୟୁ ଘଟିଥିଲା ।
ବର୍ତ୍ତମାନ ଗାଁରେ ଏହି ଡାଏରିଆରେ ଶତାଧିକ ଲୋକ ଆକ୍ରାନ୍ତ ଥିବା ଖୋଦ ଗାଁର ଆଶା ଦିଦି ସୂଚନା ଦେଇଛନ୍ତି । ଆକ୍ରାନ୍ତ ମାନେ ଦୂଷିତ ଜଳ ବ୍ୟବହାର କରି ଝାଡାବାନ୍ତିର ଶିକାର ହେଉଥିବା ଅନୁମାନ କରାଯାଉଛି । ଗାଁରେ ସରକାରଙ୍କ କୌଣସି ପାନୀୟ ଜଳର ସୁବିଧା ଆଜିଯାଏ କରାଯାଇନାହିଁ ।
ପ୍ରକାଶ ଥାଉକି ଏହି ତେନ୍ତୁଳିପାଲି ଗାଁରେ ପାନୀୟ ଜଳ ଓ ରାସ୍ତାକୁ ନେଇ ଗତ ପ୍ରାୟ ଦୁଇ ମାସ ତଳେ ଇଟିଭି ଭାରତରେ ଖବର ପ୍ରସାରଣ ହୋଇସାରିଛି । କିନ୍ତୁ ଏଯାଏଁ ପ୍ରଶାସନ କୌଣସି ପଦକ୍ଷେପ ନେଇ ନଥିବାରୁ ଏଭଳି ଦୟନୀୟ ପରିସ୍ଥିତି ଉପୁଜିଥିବା ଜଣାପଡିଛି । ଗାଁର ଆଶା ଦିଦି ଘର ଘର ବୁଲି ଲୋକଙ୍କୁ ସଚେତନ କରିବା ସହ ଜଳ ଶୋଧନ ବଟିକା ଓ ବ୍ଲିଚିଂ ପାଉଡର ବଣ୍ଟନ କରିଛନ୍ତି । ତୁରନ୍ତ ଗାଁକୁ ଡାକ୍ତରୀ ଟିମ ପଠାଯାଇ ସ୍ବାସ୍ଥ୍ୟ ସେବା ଯୋଗାଇ ଦେବାକୁ ଗ୍ରାମବାସୀଙ୍କ ଦ୍ବାରା ଦାବି ହୋଇଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
