ବୌଦ୍ଧ: କୋରୋନା ପାଇଁ ସାରାଦେଶ ଲକଡାଉନ ଥିବା ବେଳେ ଏପଟେ ଅପରାଧିକ ମାମଲା ଦିନକୁ ଦିନ ବୃଦ୍ଧି ପାଇବାରେ ଲାଗିଛି । ହତ୍ୟା, ଲୁଣ୍ଠନ, ଡକାୟତି, ଚୋରି ଆଦି ଅପରାଧିକ କାର୍ଯ୍ୟ କଳାପ ପୋଲିସ ପାଇଁ ଚ୍ୟାଲେଞ୍ଜ ସୃଷ୍ଟି କରିଛି । ବୌଦ୍ଧ ଜିଲ୍ଲାର ବିଭିନ୍ନ ଥାନାରେ ହତ୍ୟା, ଡକାୟତି ଏବେ ପ୍ରଶାସନର ଚିନ୍ତା ବଢାଇ ଦେଇଛି । ଗତ କୋଡିଏ ଦିନ ପୂର୍ବରୁ ଯୁବ ବ୍ୟବସାୟୀ ହତ୍ୟାକାଣ୍ଡର ତଦନ୍ତ ଚାଲିଥିବା ବେଳେ ଗତକାଲି ରାତିରେ ପୁରୁଣାକଟକ ଥାନା ଅଞ୍ଚଳରେ ଘଟିଛି ଆଉ ଏକ ଜଘନ୍ୟ ହତ୍ୟାକାଣ୍ଡ ।
ସୂଚନା ମୁତାବକ ତିଲେଶ୍ବର ପଞ୍ଚାୟତ ବାଦିକଟା ଗ୍ରାମର ଜଣେ ଯୁବକଙ୍କୁ ଅତ୍ୟନ୍ତ ନୃଶଂସ ଭାବରେ ହତ୍ୟା କରି ଚାରିଛକ ନିକଟସ୍ଥ ସିଙ୍ଗାଣୀବେଡାର ୫୭ ନମ୍ବର ଜାତୀୟ ରାଜପଥ କଡରେ ଫୋପାଡ଼ି ଦିଆଯାଇଛି । ଘଟଣା ସ୍ଥଳରେ ପୁରୁଣାକଟକ ପୋଲିସ ପହଞ୍ଚି ମୃତଦେହକୁ ଜବତ କରିବା ସହ ଅଧିକ ତଦନ୍ତ ଜାରି ରଖିଛି । ସେପଟେ ବୃଦ୍ଧି ପାଉଥିବା ଅପରାଧିକ ମାମଲାକୁ ଦେଖି ବୁଦ୍ଧିଜୀବୀମାନେ ଗଭୀର ଉଦବେଗ ପ୍ରକାଶ କରିଛନ୍ତି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
