ବୌଦ୍ଧ: କୋରୋନା କଟକଣା ମଧ୍ୟରେ ପାଳିତ ହେଲା ନୂଆଖାଇ ପର୍ବ । ତେବେ ଜୁହାର ଭେଟ ପାଇଁ ସାରା ପଶ୍ଚିମ ଓଡ଼ିଶାରେ ସ୍ବତନ୍ତ୍ର ସ୍ଥାନ ଅଧିକାର କରିଥିବା ବୁଟୁପାଲିରେ ରବିବାର ଏହି ଜୁହାର ଭେଟ ପରମ୍ପରା ଫିକା ପଡିଥିବା ବୁଦ୍ଧିଜୀବୀ କହିଛନ୍ତି ।
ପଶ୍ଚିମ ଓଡ଼ିଶାର ଗଣପର୍ବ ରବିବାର କୋରୋନା କଟକଣା ମଧ୍ୟରେ ପାଳିତ ହୋଇଛି । ବୌଦ୍ଧର ଈଷ୍ଟଦେବୀ ମା ଭୈରବୀଙ୍କ ନିକଟରେ ପ୍ରଥମେ ସକାଳ ନଟା ସମୟରେ ନବାନ୍ନ ଲାଗି ହେବାପରେ ଜିଲ୍ଲାର ବିଭିନ୍ନ ଦେବାଦେବୀ ପୀଠରେ ନବାନ୍ନ ଲାଗି ହେବା ସହ ସାଧାରଣ ଲୋକ ନୂଆଖାଇ ପାଳନ କରିଥିଲେ । କେତେକ ସ୍ଥାନରେ ବଳି ପ୍ରଥା ପ୍ରଚଳିତ ଯୋଗୁଁ ଛେଦ ପଡିଥିବା ବେଳେ ଅନ୍ୟ କିଛି ସ୍ଥାନରେ ଖିରି କାକରା ଭୋଗ ଲାଗିଥିଲା ।
ତେବେ ଜୁହାର ଭେଟ ପାଇଁ ପଶ୍ଚିମ ଓଡ଼ିଶାରେ ସ୍ବତନ୍ତ୍ର ସ୍ଥାନ ଅଧିକାର କରିଥିବା ବୌଦ୍ଧ ଜିଲ୍ଲାର ବୁଟୁପାଲି ଗ୍ରାମରେ ଆଜି ଏହି ପରମ୍ପରା ଟିକେ ଫିକା ପଡିଥିବା ବୁଦ୍ଧିଜୀବୀ କହିଛନ୍ତି । ରବିବାର ସଂଧ୍ୟାରେ ଶହ ଶହ ସଂଖ୍ୟାରେ ଭୁଲିଆ ସଂପ୍ରଦାୟର ସମସ୍ତ ବର୍ଗର ଲୋକେ ରାଜ ରାସ୍ତାକୁ ଓହ୍ଲାଇ ଜୁହାର ଭେଟ ପରମ୍ପରା ରେ ସାମିଲ ହୋଇଥିଲେ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
