ବୌଦ୍ଧ: ରିଜର୍ଭ ପୋଲିସର ହାବିଲଦାର ରଞ୍ଜନ ମହାପାତ୍ରଙ୍କ ମାଡମରା ଭିଡିଓ ଗତ ବୁଧବାର ଭାଇରାଲ ହେବା ପରେ ଏସପି ତାଙ୍କୁ ତୁରନ୍ତ ନିଲମ୍ବିତ କରିଛନ୍ତି । 2ଜଣ ନାବାଳିକାଙ୍କୁ ଅସଦାଚରଣ ଅଭିଯୋଗ ହେଲା ପରେ ବୌଦ୍ଧ ଥାନା ପକ୍ଷରୁ 4ଜଣ ଅଭିଯୁକ୍ତଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଥିଲା । କୋର୍ଟରେ ଜାମିନ ନାମଞ୍ଜୁର ଯୋଗୁଁ ଗୁରୁବାର ସେମାନଙ୍କୁ ଜେଲକୁ ପଠାଇ ଦିଆଯାଇଛି । ଅଭିଯୁକ୍ତମାନେ ହେଲେ ଅନୁଗୋଳ ଜିଲ୍ଲା ନୀଳକଣ୍ଠ ପଡାର ବିଶ୍ବଜିତ ଚାଉଳିଆ, ଶଙ୍କର ନାଏକ, ସୋରିଷ ପଙ୍କର, ପ୍ରବୀଣ ନାଏକ ଓ ବୌଦ୍ଧ ଜିଲ୍ଲା ସାନ ବଙ୍କାପଡାର ବିଶ୍ବଜିତ ବେହେରା ।
ଗୁରୁବାର ମାଡ ଖାଇଥିବା ଯୁବକଙ୍କ ପକ୍ଷରୁ ବୌଦ୍ଧ ଥାନାରେ ଲିଖିତ ଅଭିଯୋଗ ପରେ ରଞ୍ଜନଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଥିଲା । ପରେ ଜାମିନରେ ସେ ମୁକୁଳିଥିବା ଜଣାପଡିଛି । ଏହାସହ ଶୁକ୍ରବାର ବୌଦ୍ଧ ଏସପି ଓ୍ବାଇ ରଘୁନାଥ ରାଓ ଭାଇରାଲ ଭିଡିଓରେ ଡ୍ୟୁଟିରେ ଥିବା ଅନ୍ୟ ତିନି ଜଣଙ୍କୁ ନିଲମ୍ବିତ କରିଛନ୍ତି । ସେମାନେ ହେଲେ ବୌଦ୍ଧ ଥାନାର ପିସିଆରରେ ଘଟଣାସ୍ଥଳକୁ ଯାଇଥିବା କନେଷ୍ଟବଳ ବିଶ୍ବନାଥ କହଁର, ହୋମଗାର୍ଡ ସୁଶାନ୍ତ ସାହୁ ଓ ହୋମଗାର୍ଡ ଶିଶିର ଭଞ୍ଜ ।
ତଥ୍ୟ ଅନୁଯାୟୀ ପ୍ରତ୍ୟେକ ଦିନ ବୌଦ୍ଧ ଅଞ୍ଚଳର ଅନେକ ସ୍ଥାନରୁ ଏଭଳି ଉପାୟରେ ନାବାଳିକାଙ୍କୁ ଜିଲ୍ଲା ତଥା ରାଜ୍ୟ ବାହାରକୁ ନେଇଯାଉଥିବା ସୂଚନା ମିଳିଛି । ଆଉ ଏବେ ଗୋଟିଏ ପଟେ ନାବାଳିକା ଛାତ୍ରୀଙ୍କୁ ଅସଦାଚରଣ ଘଟଣା ଓ ଅନ୍ୟପଟେ ଭାଇରାଲ ଭିଡିଓ ଘଟଣା ସବୁଆଡେ ଚର୍ଚ୍ଚାର ବିଷୟ ହୋଇଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
