ବୌଦ୍ଧ: ଜିଲ୍ଲା ପ୍ରେସ କ୍ଲବର ଜରୁରୀ ଏକ ବୈଠକ ଅନୁଷ୍ଠିତ ହୋଇଛି । ବୈଠକରେ ଆଗ ଧାଡିର କୋରୋନା ଯୋଦ୍ଧାଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରାଯାଇଛି । ଗତ ସୋମବାର କୋରୋନାରେ ପ୍ରାଣ ହରାଇଥିବା ସାମ୍ବାଦିକଙ୍କୁ ଗଭୀର ଶ୍ରଦ୍ଧାଞ୍ଜଳି ଅର୍ପଣ କଲା ଜିଲ୍ଲା ପ୍ରେସ କ୍ଲବ ।
ଜିଲ୍ଲାରେ ସାଙ୍ଘାତିକ ହେବାରେ ଲାଗିଛି କୋରୋନା ସଂକ୍ରମଣ ର ଦ୍ବିତୀୟ ଲହରୀ । ବୌଦ୍ଧ ଜିଲ୍ଲାର ତିନୋଟି ବ୍ଲକର ବିଭିନ୍ନ ପଞ୍ଚାୟତ ରେ ଦୃତ ଗତିରେ ଏହି ସଂକ୍ରମଣ ବ୍ୟାପିବା ସହ ମୃତ୍ୟୁ ହାର ମଧ୍ୟ ବଢ଼ିବାରେ ଲାଗିଛି । ସୋମବାର ଅପରାହ୍ନରେ ବୌଦ୍ଧ ଜିଲ୍ଲାର ଜଣେ ଆଗ ଧାଡିର କୋରୋନା ଯୋଦ୍ଧା ସାମ୍ବାଦିକଙ୍କ ମୃତ୍ୟୁ ହେବା ପରେ ଜିଲ୍ଲାର ବିଭିନ୍ନ ମହଲରେ ଶୋକର ଛାୟା ଖେଳିଯାଇଛି । ମଙ୍ଗଳବାର ଜିଲ୍ଲା ପ୍ରେସ କ୍ଲବ ପକ୍ଷରୁ ଏକ ଜରୁରୀ ବୈଠକ ଅନୁଷ୍ଠିତ ହୋଇଥିଲା । ଏଥିରେ ପ୍ରେସ କ୍ଲବର ଯୁଗ୍ମ ସମ୍ପାଦକ ସାମ୍ବାଦିକଙ୍କ ମୃତ୍ୟୁକୁ ନେଇ ଗଭୀର ଦୁଃଖ ପ୍ରକାଶ କରିଛନ୍ତି । ଏଥିସହ ସାମ୍ବାଦିକଙ୍କୁ ଶ୍ରଦ୍ଧାଞ୍ଜଳି ଜ୍ଞାପନ କରାଯାଇଛି ।
ସ୍ବର୍ଗତ ସାମ୍ବାଦିକଙ୍କ ପରିବାରକୁ ସରକାରୀ ସହାୟତା ଯୋଗାଇଦେବାକୁ ଚେଷ୍ଟା କରାଯିବ ବୋଲି ସୂଚନା ମିଳିଛି । ଏହି ଅବସରରେ ବୌଦ୍ଧ କୋଭିଡ ସେଣ୍ଟର ପରିସରରେ ଡିଆରଡିଓ ଏନଏଚଏଆଇର ସହାୟତାରେ ଅକ୍ସିଜେନ ପ୍ଲାଣ୍ଟ ସ୍ଥାପନ ପାଇଁ କାର୍ଯ୍ୟ ଆରମ୍ଭ କରିଥିବାରୁ କେନ୍ଦ୍ର ସରକାରଙ୍କୁ ଏବଂ ଜିଲ୍ଲାରେ ଆରଟିପିସିଆର ଟେଷ୍ଟିଂ କେନ୍ଦ୍ର ଖୋଲିବା ନିଷ୍ପତ୍ତି ପାଇଁ ରାଜ୍ୟ ସରକାରଙ୍କୁ ଜିଲ୍ଲା ପ୍ରେସ କ୍ଲବ ସ୍ବାଗତ କରିଛି ।
ବୌଦ୍ଧରୁ ସତ୍ୟ ନାରାୟଣ ପାଣି, ଇଟିଭି ଭାରତ
